ABŞ İranla müharibə üçün Konqresdən əlavə vəsait istəməyə hazırlaşır – ÖZƏL

Olaylar.az xəbər verir ki, "The Washington Post" qəzetinin yaydığı məlumata görə, ABŞ administrasiyası İrana qarşı hərbi kampaniyanın maliyyələşdirilməsi üçün cari həftə ərzində Konqresə rəsmi müraciət edə bilər.

Nəşrin bildirdiyinə görə, hərbi əməliyyatların elə ilk günlərində artıq 5,6 milyard dollar dəyərində döyüş sursatı sərf olunub. Əməliyyatların davam etdirilməsi üçün isə arsenalların təcili doldurulmasına ehtiyac yaranıb.

Qəzetin mənbələri qeyd edir ki, tələb olunan vəsait aşağıdakı istiqamətlər üzrə bölüşdürüləcək: Yeni raketlərin və aviasiya bombalarının satın alınması; Regiondakı qoşunların logistik təminatının gücləndirilməsi; Hərbi hissələrin müdafiə qabiliyyətinin artırılması.
Pentaqon kampaniyanın gedişatını təmin etmək, həmçinin müttəfiqlərə dəstək vermək məqsədilə on milyardlarla dollar həcmində əlavə büdcə ayrılmasını nəzərdən keçirir.

"The Washington Post" vurğulayır ki, bu maliyyə sorğusu Konqresdə Prezidentin müharibə aparmaq səlahiyyətləri və büdcə xərclərinə nəzarət məsələsində yeni debatlara yol aça bilər.
Qanunvericilər, xüsusilə münaqişə xərclərinin sürətlə artması fonunda, vəsaitlərin ayrılmasının nə dərəcədə məqsədəuyğun olduğunu və onun istifadəsinə necə nəzarət ediləcəyini ciddi şəkildə müzakirə edəcəklər.