Ermənistan Daxili İşlər naziri: "Keşişlərə qarşı xüsusi prosedur tətbiq olunmur" – ÖZƏL

Olaylar.az xəbər verir ki, Ermənistanın daxili işlər naziri Arpine Sarkisyan fevralın 13-də keçirdiyi mətbuat konfransında kilsə xadimlərinin saxlanılması məsələsinə toxunub. Nazir bildirib ki, demokratik cəmiyyətdə qanun qarşısında hamı bərabərdir və Erməni Apostol Kilsəsinin (EAK) nümayəndələri ilə sıravi vətəndaşların saxlanılma proseduru arasında heç bir fərq yoxdur.

Sarkisyan qeyd edib ki, kilsə ölkə üçün ali dəyər olsa da, kilsə xadimlərinin fəaliyyəti ilə bağlı yaranan suallar "tabu" sayılmamalı və ictimai müzakirəyə çıxarılmalıdır. 

Nazirin sözlərinə görə, bu cür şəffaf yanaşma kilsə nümayəndələrinə olan etimadı daha da artıra bilər. Saxlanılma halları isə mövcud qanunvericilik standartlarına uyğun həyata keçirilir və din xadimləri üçün heç bir imtiyaz nəzərdə tutulmur.