Kavelaşvili: Gürcüstan öz gündəliyi ilə hərəkət edir – ÖZƏL

Gürcüstan prezidenti Mixail Kavelaşvili ABŞ dövlət katibi Marko Rubio ilə söhbətini şərh edərək bildirib ki, ölkəsi heç vaxt xarici gözləntilərə uyğun davranmır və öz milli maraqlarına əsaslanan müstəqil gündəliyə malikdir. 

Olaylar.az xəbər verir ki, bu barədə o, "İmedi həftəsi" proqramında danışıb.

Prezidentin sözlərinə görə, ABŞ-nin əvvəlki administrasiyası Gürcüstanın daxili siyasi proseslərinə kobud şəkildə müdaxilə edib və bu, ikitərəfli münasibətlərə ciddi zərər vurub. Kavelaşvili qeyd edib ki, həmin dövrdə USAID, NED və Soros Fondu kimi qurumlar Gürcüstan hakimiyyətinə və dövlətinə açıq şəkildə qarşı fəaliyyət göstəriblər.

O vurğulayıb ki, əvvəlki administrasiyadan qalan mənfi irsin aradan qaldırılması zaman tələb edir və yalnız bundan sonra ABŞ ilə münasibətləri "təmiz səhifədən" başlamaq mümkün olacaq. Prezident əlavə edib ki, Gürcüstan bu prosesdə açıq və prinsipial mövqe sərgiləyir.