Ağ Evin "İran planı" ifşa olundu: Xameneidən sonrakı dövr üçün hazırlıq

ABŞ administrasiyasının Omanın paytaxtı Maskatda İranla rəsmi danışıqlar apardığı bir vaxtda, pərdəarxasında tamamilə fərqli bir ssenari üzərində işlədiyi məlum olub.

Musavat.com xəbər verir ki, "National" portalı Ağ Evə yaxın mənbələrə istinadən ABŞ-ın İranın ali rəhbəri Əli Xameneinin hakimiyyətdən devrilməsi və ya vəfatı ehtimalına qarşı "keçid dövrü planı" hazırladığını iddia edib.

Floridada gizli görüş: Diaspor nümayəndələri və Kuşner faktoru

Məlumata görə, rəsmi diplomatik masada Stiv Uitkoff Tehrana şərtlər diktə edərkən, artıq bu həftəsonu ABŞ Prezidenti Donald Trampın Floridadakı iqamətgahında daha bir mühüm görüş baş tuta bilər. Müzakirələrdə ABŞ administrasiyasının rəsmiləri və İrandan olan nüfuzlu diaspor nümayəndələrinin iştirakı gözlənilir. Bu prosesdə Trampın kürəkəni və Yaxın Şərq məsələləri üzrə əsas strateqi Cared Kuşnerin mərkəzi rol oynadığı bildirilir. Kuşnerin əsas vəzifəsinin Tehranda mümkün hakimiyyət boşluğu və ya rejim dəyişikliyi zamanı idarəetməni ələ ala biləcək "alternativ qüvvələrlə" əlaqələri koordinasiya etmək olduğu vurğulanır.

"İkili strategiya" və Tehranın narahatlığı

Analitiklər hesab edirlər ki, Vaşinqtonun bu addımı Tehrana qarşı "qamçı və kökə" siyasətinin bir hissəsidir. Bir tərəfdən rəsmi masada nüvə sazişi təklif olunur, digər tərəfdən isə rejimin daxili sarsıntılar fonunda çökə biləcəyi ehtimalına qarşı hərbi və siyasi "B planı" hazır saxlanılır. İrandakı 2026-cı ilin yanvar iğtişaşlarından sonra daxili gərginliyin artması bu cür "keçid dövrü" ssenarilərini Vaşinqton üçün daha aktual edib.

Tehran rəsmiləri hələlik bu məlumatlara rəsmi reaksiya verməsələr də, kəşfiyyat qaynaqları İran tərəfinin ABŞ-ın bu "paralel diplomatiyasından" xəbərdar olduğunu və Maskat danışıqlarında bu amilin təzyiq vasitəsi kimi istifadə edildiyini bildirirlər.