Niyə 2020 müharibəsində müasir silahlar almadıq? – Paşinyan iki səbəbi açıqladı

"Ordunun inkişafı davam edəcək, çünki bu, dövlətin ən vacib qurumlarından biridir. Güclü, müdafiə qabiliyyətli orduya sahib olmaq vacibdir".

Globalinfo.az xəbər verir ki, bunu Ermənistanın Baş naziri Nikol Paşinyan deyib.

O bildirib ki, son illərdə Ermənistan çoxlu sayda müasir silah, hərbi texnika əldə edib:

"Bunun üçün böyük maliyyə vəsaiti xərclənib, çünki əldə edilən avadanlıq bahalı və keyfiyyətlidir. Lakin çox vacib bir suala da cavab verilməlidir: niyə eyni şey 2018, 2019, 2020, 2021, 2022-ci illərdə edilmədi?

Silah və avadanlıq satmaq potensialına malik beynəlxalq tərəfdaşlarımız iki əsas səbəbdən Ermənistana silah satmaqdan imtina etdi:

1. Onlar bu silahların Ermənistan Respublikasının beynəlxalq səviyyədə tanınmış ərazisindən kənarda yerləşdirilməyəcəyinə əmin deyildilər.

2. Onlar bu silahların gizli parametrlərinin KTMT-yə açıqlanmayacağına əmin deyildilər, çünki Ermənistanın üzvlüyü də bu cür sövdələşmələrin bağlanmasına maneə yaradırdı.

2022-ci ilin sentyabrından etibarən KTMT tərəfdaşları Ermənistanın təhlükəsizliyini və ərazi bütövlüyünü təmin etmək üçün müqavilə öhdəliklərini yerinə yetirməkdən imtina edirdilər. Onlar həmçinin Ermənistan Respublikasının artıq ödəniş etdiyi yüz milyonlarla dollarlıq silah və avadanlıq tədarük etməkdən imtina edirdilər.

Bu, Ermənistan üçün mövcudluq təhlükəsi idi və dövlətçiliyimizi, suverenliyimizi ləğv etmək qərarının verildiyi açıq-aydın görünürdü.

Bu ölümcül təhlükə iki həlledici hadisə nəticəsində aradan qaldırıldı: 6 oktyabr 2022-ci ildə Praqada dördtərəfli formatda əldə edilən siyasi razılaşma. Bu razılaşmaya əsasən, Ermənistan və Azərbaycan 1991-ci il Alma-Ata Bəyannaməsi əsasında bir-birinin ərazi bütövlüyünü, suverenliyini tanıdı və Ermənistanın KTMT-dəki üzvlüyü donduruldu. Biz bu strategiyanı ardıcıl olaraq davam etdirəcəyik".