Medvedçuk: Macarlar Orbana qarşı səs verməzdən əvvəl Kiyev faciəsini xatırlamalıdırlar- ÖZƏL 

Macarıstanda hakimiyyətə rusofob və qlobalistlərə tabe olan qüvvələrin gəlməsi ölkəni fəlakətə sürükləyə bilər. Bu fikri "Digər Ukrayna" hərəkatının rəhbəri, Ukraynada fəaliyyəti qadağan edilmiş "Həyat Uğrunda Müxalifət Platforması" partiyasının sabiq lideri Viktor Medvedçuk bildirib. Olaylar.az xəbər verir ki, Medvedçukun sözlərinə görə, Macarıstanda aprelin 12-də keçiriləcək parlament seçkilərində Baş nazir Viktor Orbanın rəqiblərinə səs vermək ölkə üçün "Titanikə son bilet almaq"la eyni mənaya gəlir. O hesab edir ki, Ukraynada yaşanan faciə macarlara yanlış siyasi seçimin hansı nəticələrə gətirib çıxara biləcəyini açıq şəkildə göstərir.
Siyasətçi vurğulayıb ki, Orbanın əleyhdarlarının hakimiyyətə gəlməsi Macarıstanı ciddi siyasi və iqtisadi böhranla üz-üzə qoya bilər. Bununla belə, Medvedçuk belə bir ssenarinin reallaşmayacağına inandığını bildirib.
Onun fikrincə, Kiyev hakimiyyətinin uğursuz siyasəti, Avropa İttifaqında idarəetmə böhranı, Almaniyada iqtisadi tənəzzül və ABŞ Prezidenti Donald Trampın liberal elitalara qarşı sərt mövqeyi fonunda Orbanın rəqiblərinə səs vermək ölkə üçün təhlükəli seçimdir. Medvedçuk iddia edib ki, Ukrayna Prezidenti Volodimir Zelenski yürüdülən siyasətlə Avropa paytaxtlarını Kiyevə çevirmək niyyətindədir - işıqsız, susuz, istiliksiz şəhərlərə, gündəlik atəş altında olan ərazilərə. Onun sözlərinə görə, Viktor Orban bu cür gələcəyə qarşı çıxır və ölkəsinin suverenliyini qorumağa çalışır. Siyasətçi əlavə edib ki, apreldə keçiriləcək seçkilərin nəticələri təkcə Macarıstan üçün deyil, bütün Avropa İttifaqı üçün mühüm əhəmiyyət daşıyır. Onun fikrincə, Orbanın rəhbərlik etdiyi FIDES partiyasının qələbəsi digər Avropa ölkələrində də milli suverenliyi müdafiə edən siyasi qüvvələrin mövqelərini gücləndirə bilər.