ABŞ turistlərdən ölkəyə giriş zamanı sosial media məlumatlarını tələb edə bilər- ÖZƏL

ABŞ Prezidenti Donald Tramp administrasiyası ölkəyə daxil olan bütün xarici turistlər üçün yeni tələbin tətbiqini nəzərdən keçirir. Olaylar.az xəbər verir ki, NBC telekanalının məlumatına görə, qonaqlardan son beş il ərzində istifadə etdikləri sosial media hesabları barədə məlumat vermələri tələb oluna bilər. Məlumata əsasən, təklif ABŞ Federal Aviasiya İdarəsinin hökumət bülletenində yer alıb və viza tələb olunmayan ölkələrdən gələn vətəndaşlara da şamil edilə bilər. Yəni ABŞ-a vizasız səfər edən turistlər də sosial media məlumatlarını təqdim etməyə məcbur ola bilərlər.
Bundan əlavə, ABŞ sərhəd xidmətinin turistlərdən son beş ildə istifadə etdikləri elektron poçt ünvanlarını, telefon nömrələrini, eləcə də ailə üzvlərinin əlaqə məlumatlarını tələb etməsi də gündəmdədir.
Xatırladaq ki, iyun ayında The Washington Post yazmışdı: ABŞ Dövlət Katibi Marko Rubio tələbə vizası müraciəti edən xarici vətəndaşlara qarşı yoxlamaların sərtləşdirilməsi barədə göstəriş verib. ABŞ diplomatik nümayəndəliklərinin əməkdaşları artıq müraciət edən şəxslərin sosial şəbəkə hesablarını yoxlayır.
Səhifələrdə ABŞ vətəndaşlarına, mədəniyyətinə, hökumətinə və dövlət institutlarına qarşı düşmənçilik ifadə edən paylaşımların olub-olmaması araşdırılır. Həmçinin terrorçulara dəstək verən, antisemit fikirlər səsləndirən və ABŞ üçün təhlükə yarada biləcək şəxslərin müəyyənləşdirilməsi tələb olunur.