Fransa və bir sıra Avropa ölkələri İsrailə qarşı tədbirləri dəstəkləməyə hazırdır - ÖZƏL

Bir sıra Avropa İttifaqı ölkələri, o cümlədən Fransa, İsrailin Qəzza sektorundakı hərbi əməliyyatları ilə əlaqədar məhdudiyyətlərin tətbiqini dəstəkləməyə hazırdır. Olaylar.az xəbər verir ki, bu barədə Les Echos qəzeti məlumat yayıb. Fransa ilə yanaşı, Belçika, İrlandiya və İspaniya da sanksiyaları dəstəkləməyə hazırdır. Digər tərəfdən, Bolqarıstan, Macarıstan və Çexiya hələlik bu təşəbbüsə qarşı çıxır. Avropa İttifaqı ilə İsrail arasındakı sazişlərin yenidən nəzərdən keçirilməsi üçün "kvalifikasiyalı çoxluq" - yəni ən azı 15 üzv ölkə və onların əhalisinin 65%-i dəstək verməlidir. Les Echos qəzetinin fikrincə, qərarın nəticəsini Almaniyanın mövqeyi müəyyən edəcək, çünki bu ölkə üçün İsraillə münasibətlər "tarixi həssas mövzudur".
Avropa Komissiyasının mətbuat katibi Paula Pinyu 16 sentyabr tarixində bildirib ki, 17 sentyabr Çərşənbə günü Aİ İsrailə qarşı kompleks tədbirlər paketini təqdim edəcək. Buraya İsraillə assosiativ sazişin bəzi müddəalarının dayandırılması daxildir.
Bundan əvvəl İsrailin baş naziri Benyamin Netanyahu Qəzza şəhərində - eyni adlı fələstinli ərazinin inzibati mərkəzində  intensiv hərbi əməliyyatların başladığını təsdiqləyib. Əməliyyatın məqsədi radikal HƏMAS hərəkətinin zərərsizləşdirilməsi kimi göstərilib. İsrail ordusu isə mülki əhaliyə döyüş bölgəsini tərk etmələri barədə dəfələrlə xəbərdarlıq edib, o cümlədən şəhərə təlimat vərəqələri atıb. Bölgədə vəziyyət 2023-cü il oktyabrın 7-də HƏMAS tərəfdarlarının Qəzza sektorundan İsrail ərazisinə keçməsi və sərhəd kəndlərinin sakinlərinin öldürülməsi, 250-dən çox girovun götürülməsi ilə kəskinləşib. Cavab olaraq, İsrail Qəzza sektorunda HƏMAS-ın hərbi və siyasi strukturlarını məhv etmək və girovları azad etmək məqsədilə hərbi əməliyyata başlayıb.