Nikkei Asia: Türkiyə Asiyaya silah ixrac edərək Dəniz Donanmasını modernləşdirmək istəyir - ÖZƏL
Türkiyə, Hind-Sakit Okean regionunda gərginliyin artması fonunda, hərbi gəmilərin tikintisini qismən silah satışları vasitəsilə maliyyələşdirməyi planlaşdırır. Olaylar.az xəbər verir ki, bu barədə Nikkei Asia portalı məlumat verib. Əmirliklərin Trends Research & Advisory araşdırma mərkəzinin eksperti Serhat Şuha Çubukçuoğlu bildirib ki, Ankara döyüş gəmilərinin modernləşdirilməsini dost və müttəfiq ölkələrə qarşı aqressiv ixrac siyasəti ilə qismən maliyyələşdirməyi hədəfləyir. O qeyd edib ki, Cənubi Çin dənizi ətrafındakı mübahisələr, Pakistan və Hindistan arasındakı gərginlik və digər problemlər Hind-Sakit Okean regionunda silah tələbatını artırır. Nikkei Asia-nın məlumatına görə, Türkiyə hərbi dəniz qüvvələrinin modernləşdirilməsinə təxminən 13 milyard dollar xərcləməyi planlaşdırır və bunun bir hissəsini ixracdan əldə etməyi nəzərdə tutur. 2025-ci ildə Türkiyə artıq İndoneziya ilə fregat tədarükü üzrə müqavilələr imzalayıb. Bundan əvvəl isə ölkə Malayziya, Pakistan, Türkmənistan və Azərbaycanla gəmilərin tədarükü üzrə razılıqlar əldə edib. 2027-ci ildə Malayziyaya yeni patrul gəmilərinin tədarükü gözlənilir. Xəbərdə bildirilir ki, keçən il Ankara dünya silah ixracatçıları siyahısında 11-ci, hərbi xərclərdə isə 17-ci yeri tutub. Ötən il ölkə təxminən 7,1 milyard dollar dəyərində silah ixrac edib. Bu il üçün isə hökumət büdcəyə 1,6 trilyon lirə (təxminən 38,7 milyard dollar) hərbi xərclər ayırıb.