Çin Tayvana silah satışına görə ABŞ-ın beş şirkətinə sanksiya tətbiq edəcək - ÖZƏL
Çin hakimiyyəti ABŞ-ın Tayvan administrasiyasına silah tədarükü və Vaşinqtonun Çin müəssisələri və fiziki şəxsləri ilə bağlı məhdudiyyətləri ilə əlaqədar beş Amerika şirkətinə qarşı cavab sanksiyaları tətbiq edəcək.
Olaylar.az xəbər verir ki, bu barədə Çin Xarici İşlər Nazirliyi məlumat yayıb.
"Birləşmiş Ştatlar Çinin Tayvan bölgəsinə silah satmaqla və müxtəlif bəhanələrlə Çin müəssisə və şəxslərinə qarşı qeyri-qanuni birtərəfli sanksiyalar tətbiq etməklə "vahid Çin" prinsipini açıq şəkildə pozur", - deyə bəyanatda bildirilir.
Çin Xarici İşlər Nazirliyinin dəqiqləşdirdiyi kimi, tətbiq edilən sanksiyalar bu şirkətlərin Çin ərazisindəki daşınmaz əmlakı da daxil olmaqla aktivlərinin dondurulmasını nəzərdə tutur.
"Təşkilatlar və şəxslərə onlarla əqdlər bağlamaq, əməkdaşlıq etmək və ya digər qarşılıqlı fəaliyyət növlərini həyata keçirmək qadağandır", - bəyanatda vurğulanır.