“Heydər Əliyev - milli-siyasi elitamızın zirvəsi”
“Heydər Əliyev - milli-siyasi elitamızın zirvəsi” kitabının təqdimat mərasimi keçirilib.
YAP Siyasi Şurasının üzvü Vaqif Abdullayevin yeni çapdan çıxmış "Heydər Əliyev - milli-siyasi elitamızın zirvəsi" kitabının təqdimat mərasimi keçirilib.
Olaylar.az xəbər verir ki, tədbirdə YAP Siyasi Şurasının üzvləri, Milli Məclisin üzvləri, respublikanın ictimai-siyasi, elm, mədəniyyət sahəsində tanınmış şəxsləri iştirak edib.
Atatürk Mərkəzinin direktoru, millət vəkili Nizami Cəfərov çıxış edərək bildirib ki, Azərbaycanın siyasi elminin tanınmış nümayəndələrindən biri, ictimai-siyasi sahədə çoxsaylı elmi-tədqiqat əsərlərinin və kitabların müəllifi, siyasi elmləri doktoru, professor Vaqif Abdullayevin müəllifi olduğu ""Heydər Əliyev - milli-siyasi elitamızın zirvəsi " kitabı siyasi, ictimai, sosial sahəyə yeni elmi baxışın nümunəsi hesab edilə bilər. Alimin qələmə aldığı əsərdə siyasi, iqtisadi, sosial, humanitar proseslərin düzgün və obyektiv, fəlsəfi-analitik təhlilini görmək mümkündür.
Akademik qeyd edib ki, Azərbaycan xalqının ümummilli lideri Heydər Əliyev 50 il əvvəl respublikamıza rəhbərlik etməklə Azərbaycanın inkişafında mühün bir mərhələnin əsasını qoymuşdur. Siyasi hakimiyyətə gəlişinin ilk günlərindən hər cür ideoloji-siyasi əngəllərə sinə gərərək Azərbaycan xalqının milli özünüdərki üçün bütün zəruri tədbirləri həyata keçirməyə başlayan Ulu öndər xalqın milli heysiyyatı gücləndirmək, onu öz şanlı keçmişinə, soy-kökünə qaytarmaq, habelə zəngin mədəniyyətini, incəsənətini, adət-ənənələrini yaşatmaq, ana dilini inkişaf etdirmək üçün bir sıra tədbirlər həyata keçirmişdir.
Millət vəkili bildirib ki, Azərbaycan milli elitasının formalaşması prosesində Heydər Əliyevin müstəsna xidmətləri vardır. Müəllif kitabda dərin elmi-fəlsəfi təhlillər əsasında elita məsələsini sosioloji-politoloji rakursdan, "millət-lider-elita" aspektindən işıqlandırılıb. Həm də sovet dövründə Heydər Əliyevin siyasi rəhbərliyə gəlişi ilə epoxaların ekstremallığına baxmayaraq, millətin varlığını qoruması və inamlı gələcəyə addımlamasında üzərlərinə düşən missiyanı layiqincə yerinə yetirib. Dövlət müstəqilliyinin bərpasından sonra elitanın formalaşma prosesi Yeni Azərbaycan Partiyasının bazasında yeni məzmun kəsb edib. "Müəllif haqlı olaraq qeyd edir ki, milli elitanın əsas missiyası dövlət müstəqilliyini, mədəni-tarixi dəyərləri, cəmiyyətin milli identikliyini qoruyub saxlamaqdan ibarətdir. Lakin bütün bunlar yalnız o zaman mümkün ola bilər ki, milli elita öz xalqını dünyanın inkişaf mərhələsinə uyğun olan iqtisadi, sosial və hərbi-siyasi mövqelərlə təmin edə bilsin. Elitanın fəaliyyətinin əsas mənası öz amalını millət və dövlət qarşısında məsuliyyət kimi ifadə etməsidir".
Nizami Cəfərov əlavə edib ki, "Heydər Əliyev - milli-siyasi elitamızın zirvəsi" kitabı dərin və zəngin elmi-tədqiqat nümunəsi kimi elm və təhsil, siyasi-fəlsəfi sahələrin mütəxəssisləri üçün dəyərli vəsaitdir.
"Olaylar" qəzetinin baş redaktoru Yunus Oğuz bildirib ki, məsələ kitabın təkcə Heydər Əliyev haqqında yazılması deyil, həm də milli siyasi elitanın cəmiyyətə təqdim olunmasıdır: "Milli siyasi elita hər zaman mövcud olmalıdır. Heydər Əliyev ziyalılıqdan milli elitaya keçmək üçün 50 il çalışıb. Və bundan sonra da onun qoyduğu məktəb davam edib. Milli siyasi elita hakimiyyət başında olmasa, o hakimiyyət və milli dövlət süqut edəcək. Bütün ziyalılar milli siyasi elitaya keçə bilmir. Kitabda bir neçə siyasi termin diqqətimi çəkdi. Xüsusilə "sosial lift" termini çox gözəl ifadə edilib. Milli siyasi elita bizim tarixə baxışımızdan meydan gəlməlidir. Və son nəticədə milli dövlətimizin qorunması, daha da inkişaf etdirilməsi üçün bu mövzu hökmən gərəklidir. Avropa Azərbaycan gəncini kosmopolit tərbiyədə görmək istəyir. Milli siyasi elita kosmopolit düşüncəyə yox, vətənini, dövlətini, xalqını və ailəni sevməyə yönəlməlidir."
Millət vəkili, "Ədalət" qəzetinin baş redaktoru Aqil Abbas qeyd edib ki, "Heydər Əliyev - milli-siyasi elitamızın zirvəsi" kitabı, ümumilikdə müstəqil Azərbaycanın qurucusu Heydər Əliyev və Prezident İlham Əliyev, Birinci vitse-Prezidentin fəaliyyəti ilə bağlı hərtərəfli və zəngin məlumat əldə edilməsi baxımından məzmunlu, sanballı tədqiqat əsəri hesab oluna bilər. Kitabla tanışlıq onu deməyə əsas verir ki, respublikamızda həyata keçirilən siyasi, sosial-iqtisadi və humanitar siyasətin nəzəri-praktik, fəlsəfi əsaslarının yaradılması istiqamətində mühüm uğurlardandır. "Kitab geniş və əhatəli tədqiqat əsəri kimi geniş oxucu auditoriyası üçün böyük maraq kəsb edir".
Millət vəkili Musa Quliyev bildirib ki, müəllif Ulu öndərin qurub-yaratdığı və əmanət etdiyi müasir, müstəqil Azərbaycan möhkəm təməl üzərində Prezident İlham Əliyevin rəhbərliyi altında zəngin, qüdrətli dövlətə çevrildiyini, iqtisadi, sosial, elm, təhsil, hüquq, humanitar və digər sahələrdə əldə etdiyi yüksək nailiyyətləri zəngin faktlarla təqdim edilir. Azərbaycanın Birinci vitse-prezidenti Mehriban xanım Əliyevanın geniş və çoxşaxəli fəaliyyəti sayəsində Azərbaycanda aparılan iqtisadi və sosial proqramların mühüm uğurları da dərin elmi-fəlsəfi təhlil obyekti kimi mühüm yer tutur.
YAP Yasamal rayon təşkilatının sədri, YAP Siyasi Şurasının üzvü Tağı Əhmədov vurğulayıb ki, Vaqif Abdullayev Ulu öndərimizin geniş və çoxşaxəli fəaliyyətinə, Onun Siyasi Varisi Prezident İlham Əliyevin yürütdüyü uğurlu siyasətə işıq salan bu əsəri ilə Heydər Əliyev siyasətinin təbliğində rol oynamışdır.
Xalq şairi Nəriman Həsənzadə qeyd edib ki, Heydər Əliyev Azərbaycanı qoruyub inkişaf etdirmək, hansısa mərhələdə milli müstəqilliyə qovuşdurmaq üçün ilk növbədə xalqın zəngin milli-mənəvi irsini, tarixini, mədəniyyətini, dilini, özünəməxsusluğunu ehtiva edən dəyərlərini qorumağa çalışmışdır.
Millət vəkili Çingiz Qənizadə qeyd edib ki, Azərbaycanın inkişafı ilə bağlı geniş elmi analitik yanaşmanın məhsulu olan kitabda milli dövlətçilik və demokratik ənənələrinə yer verilib. "Dövlətin gücü həm də, demokratiyanın və azad cəmiyyətin inkişafı, insan və vətəndaş hüquq və azadlıqlarına etibarlı təminat, həyatın bütün sahələrində haqqın, ədalətin bərqərar olmasındadır. Heydər Əliyev demokratik cəmiyyətin inkişafında mühüm olan bu ali meyarları nəzərə alaraq açıq cəmiyyət, vətəndaş cəmiyyəti quruculuğu prosesındə islahatların uğurla həyata keçirilməsini təmin etdi. Bu ənənə Prezident İlham Əliyev tərəfindən uğurla davam etdirilməkdədir"
Təqdimatın sonunda çıxış edən kitabın müəllifi, siyasi elmlər doktoru, professor, YAP Siyasi Şurasının üzvü Vaqif Abdullayev təqdimat mərasimində iştirak edən hər kəsə minnətdarlığını bildirib, Ulu öndərin siyasi irsinin öyrənilməsində bu nəşrin faydalı olacağına inandığını vurğulayıb.
Nigar Orucova