Qubadlı- keçmişindən güc alan, gələcəyə inamla addımlayan yurd-Özəl

"Hər bir şəhərin tarixində onun taleyini dəyişən, yaddaşlarda əbədi yaşayan günlər var. Qubadlı üçün 25 oktyabr məhz belə bir tarixdir. 2020-ci ilin həmin günündə şəhərin işğaldan azad edilməsi Azərbaycanın ərazi bütövlüyünün bərpası yolunda mühüm tarixi hadisəyə çevrildi". "Olaylar" xəbər verir ki, bunu YAP Yasamal rayon təşkilatının fəal üzvü Aygün Rəhimova deyib: "Uzun illər doğma torpaqlarından ayrı düşən qubadlılıların qəlbində yaşayan qayıdış arzusu bu Qələbə ilə yeni ümid qazandı. Qubadlının azadlığı Azərbaycan əsgərinin cəsarətini, xalqımızın birliyini və Vətənə bağlılığın sarsılmaz gücünü nümayiş etdirdi.
Bu gün Qubadlının qarşısında yeni bir mərhələ dayanır. Aparılan quruculuq işləri, yaradılan infrastruktur və doğma yurda qayıdış perspektivləri şəhərin gələcəyinə işıq salır. Qubadlının yenidən inkişaf etməsi yalnız fiziki bərpa deyil, həm də illərlə qorunub saxlanılan xatirələrin, ümidlərin və doğma yurda bağlılığın yenidən canlanmasıdır.
Tarixi yaşatmaq, onu gələcək nəsillərə düzgün çatdırmaq hər bir gəncin məsuliyyətidir. Çünki Vətənə sevgi yalnız sözlərlə deyil, milli dəyərlərimizi qorumaqla, tariximizi öyrənməklə və ölkəmizin inkişafına töhfə verməklə ifadə olunur.
Qubadlı bizə xatırladır ki, doğma torpağa bağlılıq zamanla silinmir, ümid isə ən çətin sınaqlarda belə yaşayır. Bu qədim yurdun gələcəyi azadlıq, quruculuq və firavanlıq arzuları ilə formalaşır.
Qubadlıya azadlıq yaraşır, onun gələcəyinə isə inkişaf və tərəqqi! 25 Oktyabr - Qubadlı Şəhəri Günü münasibətilə şəhidlərimizin əziz xatirəsini ehtiramla yad edir, qazilərimizə minnətdarlığımızı bildiririk. Qoy Qubadlının hər yeni günü sülhün, rifahın və xoşbəxt gələcəyin müjdəçisi olsun!"