Paşinyan Ermənistanın yeni çoxvektorlu xarici siyasət kursunu açıqladı
.jpg)
Ermənistanın Baş naziri Nikol Paşinyan bildirib ki, İrəvan birtərəfli xarici siyasət istiqamətindən tamhüquqlu çoxvektorlu kursa keçir. O, eyni zamanda Azərbaycanla sülhün institusional şəkildə möhkəmləndirilməsinə, eləcə də Avropa İttifaqı, ABŞ, Rusiya və digər tərəfdaşlarla münasibətlərin inkişafına üstünlük verildiyini qeyd edib.
Paşinyan hökumətin 2026-2031-ci illər üçün proqramının təsdiqlənməsindən sonra keçirilən mətbuat brifinqində bildirib ki, sənəd tam şəkildə "Real Ermənistan" ideologiyasına və "Dördüncü Respublika" konsepsiyasına əsaslanır.
O, Ermənistan dövlətçiliyinin əvvəlki və hazırkı mərhələlərini fərqləndirərək deyib:
"Üçüncü Respublika ilk gündən münaqişə məntiqi üzərində qurulmuşdu, Dördüncü Respublika isə sülh məntiqi əsasında formalaşıb".
Baş nazirin sözlərinə görə, yeni hökumət proqramı Azərbaycanla sərhədin delimitasiyasının davam etdirilməsini, əldə olunmuş sülhün institusional şəkildə möhkəmləndirilməsini, Türkiyə ilə diplomatik münasibətlərin qurulmasını, Avropa İttifaqı və ABŞ ilə əlaqələrin dərinləşdirilməsini, eləcə də İran, Çin və Hindistanla tərəfdaşlığın inkişafını nəzərdə tutur.
Rusiya və Avrasiya İqtisadi İttifaqı (Aİİ) ilə münasibətlərə toxunan Paşinyan bildirib ki, Moskvanın və ya digər tərəfdaşların Ermənistanın Avropa istiqaməti ilə bağlı hər hansı ultimatum irəli sürdüyü barədə iddiaları qəbul etmir.
O, Aİİ ölkələrinin Avropa İttifaqı ilə münasibətlər məsələsində referendum keçirilməsinin vacibliyi ilə bağlı birgə bəyanatını "dost jesti" adlandırıb və bunun tələb olmadığını vurğulayıb. Paşinyan bildirib ki, Ermənistan xarici əlaqələrini şaxələndirmək siyasətini davam etdirəcək.
"Rusiya bütün bazarını açsa belə, biz bu istiqamətdə səylərimizi davam etdirəcəyik", - deyə Paşinyan Ermənistan ixracının digər bazarlara genişləndirilməsi barədə danışarkən qeyd edib.
Azərbaycan istiqamətində münasibətlərə toxunan Paşinyan deyib:
"Azərbaycanla sülh üçün heç bir maneə yoxdur, çünki sülh artıq əldə olunub. Hazırda əsas vəzifə əldə edilmiş razılaşmaların institusional şəkildə möhkəmləndirilməsidir. Buraya sərhəd delimitasiyasının tamamlanması və dövlətlərarası münasibətlərin rəsmiləşdirilməsi daxildir".