ABŞ–Azərbaycan münasibətlərinin regional əhəmiyyəti daha da artır- ÖZƏL

"Azərbaycan-Ermənistan normallaşmasının sürətlənməsi eyni zamanda regional iqtisadi imkanların genişlənməsi baxımından mühüm əhəmiyyət daşıyır. Sülh şəraitinin formalaşması nəqliyyat kommunikasiyalarının açılması, ticarət əlaqələrinin genişlənməsi, sərhədyanı iqtisadi əməkdaşlığın inkişafı və yeni investisiya imkanlarının yaranmasına şərait yarada bilər. Bu proses Cənubi Qafqazı qarşıdurma və rəqabət məkanı olmaqdan tədricən əməkdaşlıq və bağlantı platformasına çevirmək potensialına malikdir". "Olaylar" xəbər verir ki, bunu Milli Məclisin deputatı Sevinc Hüseynova deyib: "Məhz bu məqam ABŞ-Azərbaycan münasibətlərinin regional əhəmiyyətini də artırır. Vaşinqtonun Bakı ilə münasibətlərinin inkişafı yalnız iki dövlət arasındakı siyasi və iqtisadi əlaqələrin gücləndirilməsi ilə yekunlaşmır. ABŞ-ın regiondakı proseslərə konstruktiv yanaşması Azərbaycan və Ermənistan arasında sülh gündəliyinin dəstəklənməsi, regional kommunikasiyaların inkişafı və iqtisadi əməkdaşlıq imkanlarının artırılması baxımından əlavə siyasi imkanlar yarada bilər.

Bununla yanaşı, Azərbaycan üçün ABŞ-la münasibətlərin inkişafı xarici siyasətdə balanslaşdırılmış və çoxvektorlu yanaşmanın davamı kimi də qiymətləndirilə bilər. Bakı müxtəlif güc mərkəzləri ilə qarşılıqlı maraqlara əsaslanan əməkdaşlıq qurmağa çalışır və bu yanaşmanın əsas məqsədi ölkənin strateji müstəqilliyini qorumaqdır. Bu mənada ABŞ ilə tərəfdaşlığın genişləndirilməsi Azərbaycanın hər hansı başqa dövlətlə münasibətləri hesabına deyil, milli maraqlara uyğun çoxşaxəli diplomatik xətt çərçivəsində həyata keçirilə bilər.

Azərbaycanın regional mövqeyinin güclənməsində enerji amili də mühüm rol oynayır. Xəzər hövzəsinin enerji resurslarının beynəlxalq bazarlara çıxarılması istiqamətində həyata keçirilən layihələr Azərbaycanı uzun müddətdir Avropanın enerji təhlükəsizliyi sisteminin əhəmiyyətli iştirakçılarından birinə çevirib. Qarşıdakı dövrdə enerji əməkdaşlığının yeni texnologiyalar, enerji infrastrukturunun şaxələndirilməsi və regional bağlantılarla tamamlanması ABŞ-Azərbaycan iqtisadi münasibətlərinin daha geniş çərçivədə inkişafına imkan verə bilər".