"Günahsız insanlar vuruldu, amma millət qorxmadı"-20 Yanvar hadisələri- ÖZƏL 

20 Yanvar faciəsi Azərbaycanın müasir tarixinə həm böyük bir kədər, həm də milli dirçəliş günü kimi həkk olunub. 1990-cı ilin yanvarında baş verən bu hadisələr sadəcə bir xalqın dinc nümayişinin yatırılması deyil, həm də beynəlxalq hüquq normalarının kobud şəkildə pozulması və imperiya ambisiyalarının qanlı təzahürü idi. 
Bu hadisənin canlı şahidlərindən, siyasi şərhçi, əməkdar  jurnalist Azər  Həsrət Olaylar.az-a açıqlama verib:
" Hər  şeydən  əvvəl  onu xüsusi vurğulamaq  istərdim  ki,  mən  20  yanvar  1990-cı il hadisələrinin  fəal  iştirakçılarından  biriyəm. Yəni  hadisələrin  içində  olmuşam, hər şeyi  gözümlə  görmüşəm. O  böyük  hərəkatın  bir  parçası  olmuşam. Ona  görə  də bəzən  bəzi  adamların  20  yanvarla  bağlı uydurduqları  yalanlar mənim  kimi  insanları  üzür. Xüsusən  də  guya  bizim  silahlı  olmağımız,  guya  rus  əsgərlərini  öldürməyimiz  və  digər  uydurmalar  bizim  gördüklərimizlə  tərs  düşür. Çünki  şəxsən  özüm  Salyan kazarmaları  deyilən  ərazidə  ayın 17-i, 18-i və 19-dan  20-nə  keçən  o  məşum  gecə orda  olmuşam,  dostlarımızla  bir  yerdə  patrul  xidməti  göstərmişəm, təbii ki bu qeyri-rəsmi idi, tələbə  gənclər  olaraq. Yəni  20  yanvarı  öz  gözlərimlə  görmüşəm-şəhidlərin  dəfnində  və  sonrakı  mərhələlərdə də həmçinin. Aradan  illər  keçəndən  sonra  düşündüm  ki, bunları  kitab  halında  çap  etdirim ki,  gələcək  nəsillər  üçün  qalsın.  2016-cı  ildə  "Mən  tanıqlıq   edirəm" adlı   bir roman yazdım. Amma  sənədli  romandır, sadəcə  bədii  dildə  yazdım, ona görə də bədii ədəbiyyat nümunəsi kimi təqdim edirəm.  Mən  həmişə inanmışam, bu  gün  də  inanıram  ki,  20 yanvar   müasir  Azərbaycan  tarixinin  ən  şərəfli  səhifələrindən  biridir. Həmin  gün  biz  millət olaraq  əliyalın  şəkildə  işğalçı  rus  tanklarının  üzərinə  şığıdıq, onlar  bizim  üzərimizə  ağır  silahlarla,  ağır  texnika  ilə  gəldilər,  günahsız  insanlara  atəş  açdılar,  hətta evin  içində  oturan  insanlara  belə  təsadüfi  atəşlər  açıldı,  eyvanlarda  insanlar  vuruldu, xəstəxanalara  hücumlar  edildi, təcili  yardım  maşınlarına, ictimai  nəqliyyata hücumlar edildi, insanlar  öldürüldü.  Amma  bütün  bunlar  bizi millət  olaraq  qorxutmadı ,  əksinə biz  daha  da  möhkəmləndik,  daha  qərarlı  olduq  və  milli  azadlıq  yolunda  bir  addım  belə  geri  atmadıq.  Moskvanın-Rusiyanın məqsədi bizi  bu yolla qorxutmaq,  yolumuzdan çəkindirmək  idi. Amma  buna  nail  ola  bilmədilər".

İbrahim  Məmmədli