Türkiyə və Rusiya Zəngəzur dəhlizi layihəsində iştirak edəcəkmi - Mirzoyandan açıqlama  

Rusiya və Türkiyənin TRIP layihəsində iştirakı müzakirə olunmayıb.Musavat.com-un məlumatına görə, bunu Ermənistanın xarici işlər naziri Ararat Mirzoyan TRIP layihəsinin icra sənədini imzaladıqdan sonra Vaşinqtondan canlı efirdə bildirib. Türkiyənin layihədə iştirakının mümkünlüyü ilə bağlı sualı cavablandıran nazir qeyd edib ki, bu, müzakirə olunmayıb, çünki TRIP erməni-amerikan birgə biznes layihəsidir. Lakin onun sözlərinə görə, blokun açılmasının daha geniş kontekstində Türkiyə tərəfinin iştirakı olmadan böyük logistik keçidin əldə olunmayacağı və Ermənistanın blokunun açılmasının da mümkün olmayacağı göz qabağındadır. Nazirin sözlərinə görə, Türkiyə ilə müzakirələr uğurla gedir və yaxın vaxtlarda öz nəticəsini verəcək.

Bildirib ki, Gümrü-Qars yolu olmadan yüklər Türkiyədən keçməklə Avropaya gedə bilməyəcək. Nazir hesab edir ki, Türkiyənin (kommunikasiyaların) bir hissəsi olması məntiqlidir, lakin konkret olaraq TRIP vasitəsilə deyil, bəlkə də TRIP-in davamı kimi. Nazirin sözlərinə görə, Rusiyanın layihədə iştirakı da eyni səbəblərdən müzakirə olunmayıb. TRIP üçün çərçivə aydındır. Lakin onun yaxın və ya uzaq qonşuları əhatə edən böyük blokun açılmasında iştirakı mümkündür. "Biz onu Rusiya Federasiyasının hüdudlarından kənarda buraxmaq niyyətində deyilik", Mirzoyan deyib. Ermənistan baş naziri əvvəllər bildirib ki, Cənubi Qafqaz Dəmir Yolunda təmsil olunan Rusiya tərəfi çatışmayan hissələri bərpa etməyə hazır deyilsə, Ermənistan bunu özü edəcək.