Vəhşilikləri ilə ad çıxaran haylar fetişləşdirilir - ÖZƏL

"Ötən əsrin 70-ci illərindən üzü bəri hay terorrçuları 31  türk diplomatını qətlə yetirib. Özlərindən başqa həmən diplomatların 27 ailə üzvü də hay terrorunun qurbanı olublar. Əlbəttə, ötən əsrin 20-ci illərində də  haylar Azərbaycan və Türkiyənin  mühüm dövlət postları tutmuş bir neçə təmsilçisini qətlə yetirmişdilər. Amma  70-ci illərdə bu, artıq bir növ gizli savaş şəklini almışdı ki, 1983-cü ilin 15 iyulunda  Parisin Orli hava limanında baş vermiş  növbəti terrorları araşdırılarkən onu törədənlərlə  Fransa kəşfiyyatının işbirliyində olduğu üzə çıxdı. Yəni aydın oldu ki, hayların ASALA və JCAG  terror qruplaşmaları özbaşına deyil, bəzi yırtıcı dövlətlərin güc strukturlarının  qanadı altında fəaliyyət göstərirlər". "Olaylar" xəbər verir ki, bunu deyən millət vəkili Sahib Alıyevin sözlərinə görə, bu gün həmən ASALA-nın 5 yaramazının Türkiyənin Lissabondakı diplomatik təmsiçiliyinə soxulub müvəqqəti işlər vəkilinin xanımını qətlə yetirmələrindən düz 40 il ötür: " Görünür, bu terroru bağlı olduqları çevrələrlə razılaşdırmadıqlarından o beş yaramaz  məhv ediləcəklərini düşünüb diplomatik təmsilçilikdə özlərini də  partlatmışdılar. İndi Laçındakı sərhəd-keçid məntəqəsi önündə, eləcə də Qarabağda şou çıxaranların ABŞ, Fransa və  Livandakı soydaşları  neçə illərdir ki, 27 iyulu "Lissabon 5" adı altında anım törəni olaraq keçirir, o zaman cəhənnəmə gedən  terrorçularına mədhiyyə deyirlər. Yəqin bu gün Ermənistanda da onlar üçün göz yaşı axıdanlar tapılacaq. Xatırladaq ki, hərbi xunta hakimiyyətdə olduğu vaxtlardakı kimi indi də orada vəhşilikləri ilə ad çıxaran haylar fetişləşdirilir.  Onlar terrorçu ünsürlərini "örnək şəxsiyyət"  gözündə gördüklərini heç vaxt gizlətməyiblər, hətta  sovetlər dönəmində də həmən yaramazların adlarını əbədiləşdirməyə çalışıblar.  Ona görə də kimsə deyə bilməz ki,  belə bir mühitdə yeni terrorçular yetişməyəcək, yaxud da yetişdirilməyəcək.  Ancaq yetişdirənlər də, yetişənlər də hay terror qruplaşmalarının üzvlərinə qarşı Türkiyənin hansı təsirli addımlar atdığını yada salsalar pis olmaz. Xatırladaq ki, türk diplomatlarının qətllərinə bəzi böyük dövlətlərin belə terror aktlarını sərt bir dillə pisləmələri nəticəsində deyil,  məhz həmən addımlardan sonra son qoyuldu".