Azərbaycan xalqı ordunun gücünə inanır

"Azərbaycan xalqı və qəhrəman oğullarımız ata-babalarımızın bizə əmanət etdiyi müqəddəs Vətən torpaqlarını hər an düşməndən qorumalı və onun müdafiəsi üçün hər an hazır olmalıdır". Bunu "Olaylar"a deyən Nəsimi rayon təhsil işçisi Nazir Əhmədovun sözlərinə görə, hazırda Azərbaycanın işğalda olan torpaqlarımızı azad etməyə qadir olan güclü ordusu  var:  "Bu gün Silahlı Qüvvələrimizin sıraları daha da sıxlaşır, texniki təchizatı müasirləşir. Azərbaycan ordusu dünya silahlı Qüvvələrinin reytinqində 50-ci pillədə  qərərlaşır. Dövlətimizin Silahlı Qüvvələrimizə diqqəti və qayğısı  xalqımızın ordumuza olan inamını artırmışdır.  12 iyul tarixində  Azərbaycan Respublikasının Tovuz rayonu ərazisində atəşkəsin erməni təxribatçıları tərəfindən pozulması zamanı xalqımız bütövlükdə Silahlı Qüvvələrimizə və Ali Baş Komandana dəstək yürüşü keçirərək bir daha dünya ictimaiyyətinə xalqın, ordunun və Ali Baş komandanın torpaqlarımızın müdafiəsində birlik olduğunu  sübut etdi. Ali Baş Komandan İlham Əliyevin çağrışına səs verən 55130-dan çox vətəndaşın  Səfərbərlik və Hərbi xidmətə Çağrış üzrə Dövlət Xidmətində  qeydiyyatdan keçməsi Azərbaycan xalqının vətənpərvərlik ruhunun yüksək olmasını bir daha sübut etdi. Dünyanın müxtəlif ölkələrində yaşayan həmvətənlərimiz Ali Baş Komandanın çağrışına səs verərək Vətənin müdafiəsi üçün hazır olduqlarını bildirdilər. Erməni səfirliklərinin qarşısında təşkil olunan mitinq və yürüşlərdə fəal iştirak edərək "Qarabağ Azərbaycanındır", "Erməni işğalına son", "Ali Baş Komandan, biz sizin əsgərlərinizik" kimi şüarlar səsləndirirdilər. Bütün bunlar  Azərbaycan xalqının öz Prezidenti- Ali Baş Komandan  İlham Əliyevə və Şanlı Ordumuza inamının güclü olduğunu bir daha sübut edir".