Ermənistanın növbəti təxribatları nəyə hesablanıb? -ŞƏRH
Ermənistanın növbəti təxribatları nəyə hesablanıb?
İşğalçı ölkənin rəhbərliyi Qarabağda aktiv hərbi əməliyyatların başlamasında maraqlıdır
Işğalçı Ermənistan ciddi cəhdlə cəbhədə təxribat törətməyə, mövcud vəziyyəti gərginləşdirməyə və Qarabağ cəbhəsində aktiv hərbi əməliyyatların başlamasına çalışır. Son günlər təmas xəttində müntəzəm olaraq törədilən təxribatlar da məhz buna hesablanıb. Bir-birinin ardınca düşmən qüvvələrinin həyata keçirdiyi təxribat əməllərinə daha biri əlavıə edilib. Belə ki, martın 6-da Ermənistan mətbuatında Azərbaycan-Ermənistan dövlət sərhədinin Qazax rayonu istiqamətində Azərbaycan tərəfinin diversiya keçirməsi və nəticədə Ermənistan Silahlı Qüvvələrinin 1 nəfər hərbi qulluqçusunun yaralanması barədə məlumatlar yayılıb.
Dövlət Sərhəd Xidmətinin Mətbuat Mərkəzindən bildirilib ki, DSX-nin hərbi qulluqçuları tərəfindən diversiya keçirilməsi barədə məlumat həqiqətə uyğun deyildir və reallığı əks etdirmir. "Mart ayının 6-da səhər saatlarından başlamaqla Qazax rayonunun Cəfərli kəndləri istiqamətindəki sərhəd döyüş məntəqələrimiz Ermənistanın İcevan rayonunun Sevkar və Sarıquyuq kəndləri yaxınlığında yerləşən Ermənistan Silahlı Qüvvələrinin bölmələri tərəfindən iri çaplı silahlardan və snayper tüfənglərindən intensiv atəşə tutulub.
Düşmən təxribatının qarşısı alınıb, sərhəd döyüş məntəqələrimizə qarşı atəşin açıldığı Ermənistan Silahlı Qüvvələrinin döyüş mövqeləri cavab atəşi ilə susdurulub", DSX-dan bildirilib.
Cəbhə xəttində həyata keçirilən təxribatlara diqqət çəkən Cənubi Qafqazda Sülh və Təhlükəsizlik İnstitutunun rəhbəri, politoloq Məhəmməd Əsədullazadə deyib ki, Ermənistanın Azərbaycanla dövlət sərhəddində təxribatlara əl atması əsasən, digər ölkələrin diqqətini bu istiqamətə yönləndirməyi hesablanıb. Onun sözlərinə görə, prinsipcə atəşkəs mütəmadi olaraq işğal olunmuş ərazilərdə təmas xətti istiqamətində olmalıdır: "Amma, Ermənistan cəbhə xəttində deyil, dövlət sərhəddi istiqamətində təxribatlara əl atmaqdadır. Azərbaycan tərəfi dövlət sərhəddində atəşkəsi pozmaqda maraqlı olmayıb və bunu Ermənistan etməklə yenidən Qazax istiqamətində 2014-cü ilin avqust ayında olduğu kimi Azərbaycanı hərbi eskalasiyaya məcbur edir. Ermənistan çalışır ki, Azərbaycan Qazax istiqmətində Ermənistana zərbə vursun və Yerevan Kollektiv Təhlükəsizlik Müqaviləsi Təşkilatına müraciət edərək, bu təşkilatın hərbi kontingentini Azərbaycanla sərhəddə yerləşdirsin. İtkiləri çoxaltmaq üçün Yerevan sərhəddə Rusiyanın 102-ci bazasında peşəkar snayper kurslarında təlimat alan snayperçiləri yerləşdirib. Bununla məqsəd Azərbaycanı provakasiyaya cəlb etməkdir. Bir ay ərzində Azərbayan demək olar ki, işğal olunmuş ərazilər istiqamətində deyil, dövlət sərhəddində ikinci itki verir". Politoloq hesab edir ki, Ermənistanın bu planının arxasında xarici amillər dura bilər: "Çünki, bir neçə gün bundan əvvəl Ermənistanın baş qəraragah rəisi Vartanyan Rusiya ilə daima əlaqədə olduqlarını, məsləhətləşdiklərini vurğuladı. Demək, burada əsas plan Azərbaycanla sərhəddə KTMT adı altında Rusiyanın hərbiçilərinin yerləşdirmək planı ola bilər. Dövlət sərhhədində Ermənistanın bu təxribatalarının arxasında müəyyən hədəflərdə dayanması mümükndür. Bu, Rusiyanın planıdır və məqsəd Azərbaycanın Qərblə enerji, nəqliyyat əlaqələrini nəzarətdə saxlamaqdır. Azərbaycan bu istiqamətdə KTMT adı altında istənilən ölkənin hərbiçilərinin yerləşdirilməsini nəzarətdə saxlamalı və Rusiya ilə danışmalıdır. Əgər, digər ölkənin hərbiçiləri sərhəddə yerləşdirilsə, Azərbaycan tərəfi boru kəmərlərinin qorunması üçün Türkiyə hərbiçilərini də bu istiqamətdə yerləşdirilməsini nəzərdən keçirməlidir. Çünki, neft və qaz kəmərlərinin mühafizəsi üçün Türkiyə-Azərbaycan və Gürcüstanın hərbi təlimləri keçirilir. Azərbaycan sərhəddə hansı qüvvələrin yerləşdirilməsindən asılı olamayaraq preventiv zərbələrdən çəkinməməli və Ermənistanın bu təxribatlarının qarşısını almalıdır. Ermənistana bu istqamətdə elə bir zərbə endirilməlidir ki, Yerevan bu kimi təxribatlara getməyə cürət etməsin".
Füzuli
Olaylar.az