“Xarıbülbül” festivalı yalnız mədəni deyil, həm də dərin tarixi əhəmiyyət daşıyır - Tünzalə Ağayeva

Şuşa şəhərində keçirilən "Xarıbülbül" Beynəlxalq Musiqi Festivalı bütün Azərbaycan xalqı üçün yalnız mədəni deyil, həm də dərin tarixi əhəmiyyət daşıyır.

Bunu Trend-ə Azərbaycanın xalq artisti Tünzalə Ağayeva bildirib.

"Bu gün "Xarıbülbül" festivalı mədəni yaddaşın bərpasının, mənəvi birliyin və tarixi ədalətin rəmzidir. Şuşa hər zaman Azərbaycan musiqisinin, incəsənətinin və poeziyasının ürəyi olub və burada belə genişmiqyaslı beynəlxalq festivalın keçirilməsi xüsusi məna daşıyır", - deyə müğənni qeyd edib.

T.Ağayevanın sözlərinə görə, festivalın ab-havası müxtəlif nəsillərdən və ölkələrdən olan sənətçiləri mədəniyyət və sülh kimi ortaq dəyərlər ətrafında birləşdirir.

"Bu torpaqda yenidən musiqinin səslənməsi həyatın, quruculuğun və gələcəyin göstəricisidir. Burada tarix, incəsənət və milli ruhun bağlılığı xüsusilə hiss olunur", - deyə xalq artisti vurğulayıb.

O əlavə edib ki, Şuşada keçirilən festivalda iştirak etmək hər bir azərbaycanlı sənətçi üçün böyük şərəf və məsuliyyətdir.

"Bizim üçün bu, sadəcə konsert məkanı deyil. Bu, böyük tarixə və enerjiyə malik bir məkandır ki, burada hər mahnı və hər nota tamamilə fərqli səslənir", - deyə T.Ağayeva bildirib.

Qeyd edək ki, mayın 14-də Şuşa şəhərində, Cıdır düzündə IX "Xarıbülbül" Beynəlxalq Musiqi Festivalının açılışı keçirilib. Festival Heydər Əliyev Fondu və Azərbaycan Respublikasının Mədəniyyət Nazirliyi tərəfindən təşkil olunub.

İki gün ərzində Şuşa şəhərinin müxtəlif məkanlarında konsertlər və mədəni tədbirlər keçiriləcək. Festival mədəniyyətlərarası dialoqun inkişafına, musiqi əlaqələrinin möhkəmləndirilməsinə və müxtəlif ölkələrdən olan sənətçilər arasında yaradıcılıq mübadiləsinə yönəlib.