Kadr çatışmazlığı mövzusu müzakirə olunub və bu istiqamətdə işlərə başlanılıb - Adil Kərimli

Mədəniyyət nazirliyində kadr islahatları çərçivəsində əsas diqqət ona yönəlib ki, daha peşəkar, xüsusi bilik və bacarığı olan şəxslər, yəni müvafiq sahələr üzrə mütəxəssislər işə cəlb olunsunlar.

Olaylar xəbər verir ki, bunu COP29 tədbiri zamanı jurnalistlərə açıqlamasında Mədəniyyət naziri Adil Kərimli deyib.

O bildirib ki, kadr çatışmazlığı mövzusu müzakirə olunub və bu istiqamətdə işlərə başlanılıb.

"Kadr hazırlığı prosesi nazirliyin fəaliyyətinin əsas prioritet istiqamətlərindəndir. Bu və ya digər istiqamətlər üzrə ali təhsil almış şəxslərin mədəniyyət sahəsinə cəlb olunması əsas niyyətlərimizdən biridir. Mədəniyyət sahəsi üzrə təhsil almış şəxslərin menecerlik qabiliyyətlərinin artırılması üzrə əlavə tədris proqramları nazirlik tərəfindən təqdim edilib. Bu il cənab Prezidentin müəyyən etdiyi istiqamətlər üzrə Mədəniyyət Nazirliyi xaricdə təqaüd proqramı təsis etdi. Proqram çərçivəsində bir çox azərbaycanlı tələbə təqaüd alaraq mədəniyyət sahəsi üzrə təhsillərini davam etdirirlər. Mədəniyyət menecerləri, digər zəruri peşələrlə bağlı kadr hazırlığı barədə ciddi işlər görülməlidir. Həm xarici mütəxəssislərdən ibarət təlimçilərin bura cəlb edilməsi, həm xarici təhsil müəssisələrdə tələbələrimizin əlavə təhsilə cəlb edilməsi istiqamətində tədbirlər görülür",- o əlavə edib.

Mədəniyyət naziri vakant yerlərin mövcudluğunu da diqqətə çatdırıb.

"Bilirsiniz ki, ötən il kadr bankı yaratmışıq. Kadr bankının təhlil edilməsi və insanların müraciətləri nəzərə alınmaqla, müvafiq istiqamətlərə təyinatlar barədə ciddi işlər aparılır",- nazir qeyd edib.