Daşkənddə "Mədəniyyət və incəsənət sahəsində islahatlar" Beynəlxalq Forumu keçirilir- ÖZƏL
Özbəkistanın paytaxtı Daşkənddə "Mədəniyyət və incəsənət sahəsində islahatlar" Beynəlxalq Forumu keçirilir.
Tədbir milli və beynəlxalq səviyyədə türk dünyası mədəni irsinin qorunması və təbliği, eləcə də ölkələr arasında ənənələrin mübadiləsi və mədəni əlaqələrin gücləndirilməsini hədəfləyir. Çünki qloballaşma kontekstində mədəni kimliyin qorunması və beynəlxalq mədəni dialoqun inkişafı xüsusi əhəmiyyət kəsb edir.
Tədbir çərçivəsində baş tutmuş mərasimin ilk günündə beynəlxalq ekspertlərin çıxışları, mədəniyyət və incəsənət sahəsində ən yaxşı təcrübələrin müzakirəsi olub. Habelə, Özbəkistanın mədəniyyət naziri Ozodbey Nazarbeyovun "Mədəniyyət və incəsənət sahəsində Özbəkistanda aparılan islahatlar" mövzusuna dair prezentasiya tədbir iştirakçılarına təqdim olunub. Daha sonra beynəlxalq ekspertlər, Türk Mədəniyyəti və İrsi Fondunun prezidenti Aktotı Raimkulova, TÜRKSOY-un Baş katibi Sultan Rayevinin çıxışı zamanı mədəniyyət və incəsənət sahəsində dünya praktikasının tətbiqi müzakirə mövzusu olub.
Adı çəkilən eskpertlərdən savayı UNESCOnun məsləhətçisi Kristina İamandi, Frana universitetinin şəhərsalma planlamasının baş eskperti E.Haybret, Özbəkistan Dövlət Musiqili Teatrının direktoru B.Qəniyev forumun müzakirələrinə zənginlik qataraq, mədəni mübadilə və əməkdaşlığın gücləndirilməsinə öz dəyərli təkliflərini verib.
Forumdan sonra, Özbəkistanın mədəniyyət nazirinin xarici qonaqlarla görüşü keçirilib.
Tədbir çərçivəsində həmçinin özbək çalğı alətlərinin sərgisi, xarici qonaqların yerli media nümayəndələri ilə müsahibəsi, Özbəkistan Akademik Milli Dram Teatrının təqdimatında "Çolpan" tamaşası nümayiş olunub.
Sonda Özbəkistanın mədəniyyət naziri adından forum iştirakçılarına ziyafət verilib.
Qeyd edək ki, "Mədəniyyət və incəsənət sahəsində islahatlar" Beynəlxalq Forumu oktyabrın 23-25-də Daşkənddə keçirilir. Azərbaycandan tədbirə dəvətlilər sırasında yazıçı-publisist, əməkdar mədəniyyət işçisi Yunus Oğuz da forumda yer alıb.
