18:01

Oktyabrın 10-da Bakıda COP29 öncəsi tədbirinin ilk günü başa çatıb.

Olaylar.az Trend-ə istinadən xəbər verir ki, Heydər Əliyev Mərkəzində keçirilən tədbir "Ambisiyanı artırmaq və iqlim fəaliyyətinə təkan vermək" mövzusuna həsr olunub.

Əvvəlcə COP29-un müəyyən edilmiş Prezidenti, Azərbaycanın ekologiya və təbii sərvətlər naziri Muxtar Babayev Prezident İlham Əliyevin tədbir iştirakçılarına müraciətini oxuyub.

Tədbirdə çıxış edən Muxtar Babayev bildirib ki, COP29 iqlim dəyişikliyi ilə mübarizədə həll edici rol oynayacaq.

"Şəffaflıq çərçivəsi bizim kollektiv məsuliyyətimizi təmin edir. Fəxrlə deyə bilərəm ki, Bakı şəffaflıq platforması təqdim edirik. Artıq Afrikada, Mərkəzi Asiyada təlimlər keçmişik. Bu istiqamətdə işlərimizi davam etdirəcəyik.

İqlim dəyişikliyi istiqamətində maliyyə cəlb etməliyik. Bu olmadan nailiyyət əldə etmək çətindir. Biz dayanıqlı inkişaf məqsədlərimizə uyğun olaraq investisiya planlarımızı qurmalıyıq. COP29 iqlim dəyişikliyi ilə mübarizədə qlobal əməkdaşlığı gücləndirmək üçün platformadır. Qarşımızdakı yol asan deyil. Lakin qətiyyətli, ambisiyalı olaraq dayanıqlı gələcək qura bilərik",- deyə o bildirib.

Öz növbəsində, BMT-nin Baş katibinin müavini Əminə Ceyn Məhəmməd qeyd edib ki, COP29 iddiaları və öhdəlikləri real nəticələrə çevirməlidir.

"Temperaturun daha da artması fəlakətlərə səbəb ola bilər. İnkişaf edən ölkələrin və beynəlxalq maliyyə institutlarının səsini ucaltmaqla nailiyyətlərə imza atmalı, maliyyə boşluğunu bərpa etməliyik.

COP29 iddiaları və öhdəlikləri real nəticələrə çevirməlidir. Paris sazişinə üzv olan hər bir ölkə adaptasiya tədbirləri həyata keçirməlidir. Bütün tərəflərin vahid razılığa gəlmək niyyətini gördüm. Bu hədəflərimizə çatmağı mümkün edir. Zaman bu sazişə uyğun hərəkət etmə zamanıdır. Bakı bu məsələlərin həllinə təkan verəcək. Düşünürük ki, COP29 konkret nəticələr ortaya qoyacaq. BMT bu prosesə dəstək olmağa hazırdır",- deyə o bildirib.

BMT-nin İqlim Dəyişmələri üzrə Çərçivə Konvensiyasının icraçı katibi Saymon Stil vurğulayıb ki, iqlim dəyişikliyi ilə mübarizədə maliyyələşmə ən vacib elementlərdəndir və hər bir ölkə öhdəliklərinə sadiq olmalıdır.

"COP29 bizə ambisiyalı bir məkan yaradır. Biz hər bir ölkə üzərində öhdəliyi artırmalıyıq. İqlim dəyişikliyi ilə bağlı olan bu öhdəliklər çox mühüm əhəmiyyət kəsb edir. Ölkələr artıq öhdəliklərinin icrasına başlayıb. Biz bunu təqdir edirik. Bütün tərəfləri birgə fəaliyyətə çağırıram.

COP29-da isə məqsəd bütün planların reallığa çevrilməsidir. Biz bu istiqamətdə əlimizdən gələni etməyə hazırıq",- deyə o bildirib.

Bundan əlavə, Avropa İttifaqının (Aİ) iqlim fəaliyyəti üzrə komissarı Vopke Hoekstra qeyd edib ki, Aİ iqlim elminə geniş maliyyə dəstəyi təqdim edib.

"Xatırlatmaq istəyirəm ki, mövcud iqlim vəziyyətini dəyişdirməyə başlamaq üçün elmə əsaslanmaq son dərəcə vacibdir. Buna görə də, hər bir halda nə etməli olduğumuzu izah edəcək modelçilər və mütəxəssislərin iştirak etdiyi bir sıra layihələri maliyyələşdirdik", - o bildirib.

O, həmçinin bütün dünya üçün bu məsələdə hansı tədbirlərin görülməsinin son dərəcə vacib olduğunu vurğulayıb.

"Biz yalnız Avropa İttifaqı çərçivəsində bu ambisiyalı yolda irəliləməyə davam etməli deyilik, həm də əlimizdən gələni etdiyimizə əmin olmaq üçün həm burada, həm də dünyada bu məsələ üzrə çox yaxından çalışmalıyıq", - Vopke Hoekstra qeyd edib.

Tədbir öz işini sabah davam etdirəcək.

------------
09:37

Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransı (UNFCCC) ərəfəsində keçirilən PreCOP29 iclası başlayıb.

Olaylar.az Trend-ə istinadən bildirir ki, bu iclas, iqlim sammitindən əvvəl keçirilən tədbirdir.

PreCOP adətən COP-dan bir ay əvvəl keçirilir və Paris İqlim Sazişinin iştirakçılarının iqlim dəyişmələrinə qarşı mübarizə üzrə əsas məsələlərdə mövqelərini dəqiqləşdirmək məqsədi daşıyır.

Bakıda keçirilən PreCOP29 "Ambisiyaların artırılması və fəaliyyətlərin təmin edilməsi" devizi altında baş tutacaq.

Konfransın açılış mərasimində COP29-un müəyyən edilmiş prezidenti Muxtar Babayev, COP28-in prezidenti Sultan Əl Cabir, BMT-nin Baş katibinin müavini Əminə Ceyn Məhəmməd, BMT-nin İqlim Dəyişmələri üzrə Çərçivə Konvensiyasının icraçı katibi Saymon Stil və köməkçi icra orqanının (SBI) sədri Nabil Munir çıxış edəcəklər.

Plenar müzakirə "COP29-a gedən yol" mövzusunda keçiriləcək, çıxışçılar "onlar üçün COP29-da uğurlu, balanslaşdırılmış nəticə nə deməkdir və niyə?" suallarına cavab verərək 2-3 prioriteti vurğulayacaqlar.

3 mövzu üzrə paralel tədbirlər nəzərdə tutulub - "Yeni Kollektiv Kəmiyyət Məqsədi" (NCQG), "Adaptasiya, itkilər və zərərlər" və "İqlim dəyişmələrinin təsirlərinin azaldılması".

Bundan əlavə, 10 oktyabr tarixində COP-un "Trio" rəhbərliyi (BƏƏ, Azərbaycan və Braziliya) "Missiya 1.5: Beynəlxalq əməkdaşlığın gücləndirilməsi" üzrə Yol xəritəsini təqdim edəcək.

Qlobal iqlim tədbirləri üzrə şəffaflığın stimullaşdırılması barədə da müzakirələr aparılacaq.

Proqrama uyğun olaraq, 11 oktyabrda Böyük Britaniya, Vanuatu və Azərbaycanın təşkilatçılığı ilə "İqlim və İnkişaf-2024" üzrə Nazirlər Konfransı keçiriləcək.

Həmçinin "İqlim dəyişmələrinə davamlı gələcək üçün insan potensialının inkişafı" mövzusu müzakirə olunacaq.

COP28, COP29 və Bərpa Olunan Enerji Mənbələri üzrə Beynəlxalq Agentlik (IRENA) PreCOP29 iştirakçılarını enerji sahəsində konsensus nəticələri ilə tanış edəcəklər.

Bununla yanaşı, iqlim və sülh üzrə ümumi məsləhətləşmələr aparılacaq və PreCOP29-un sonunda COP29-un əməliyyat şirkəti logistik brifinq təşkil edəcək.

Qeyd edək ki, 11-22 noyabr tarixlərində Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) keçiriləcək.