Bakıda neft-qaz sənayesinin inkişafına həsr edilmiş beynəlxalq konfrans keçiriləcək

Aprelin 9-10 tarixlərində Bakıda SOCAR-ın dəstəyi, Böyük Britaniyanın "Confidence Capital" şirkəti və Bakı Ali Neft Məktəbinin təşkilatçılığı ilə VIII Beynəlxalq Xəzər neft-qaz, ticarət-nəqliyyat konfransı keçiriləcək. "OLAYLAR"-ın ARDNŞ-ə istinadən verdiyi xəbərə görə, konfransda Xəzər regionunda karbohidrogen ehtiyatlarının hasilatı, nəqli və satışının mövcud vəziyyəti və perspektivləri haqqında beynəlxalq ekspertlərin, Xəzəryanı ölkələrin yanacaq-enerji komplekslərinin rəhbər işçilərinin və mütəxəssislərinin məruzələri dinləniləcək. Konfrans həm də Azərbaycanın neft strategiyasının uğurlarının təbliği və mütəxəssislər arasında işgüzar əlaqələrin yaradılması üçün əlverişli platforma olacaq.