ABŞ-ın Suriyada İŞİD-ə qarşı hava zərbələri dayandırılıb

Amerika hərbi təyyarələri son bir neçə saat ərzində Suriyanın şimalındakı İslam Dövləti (İŞİD) mövqelərinə ikinci hava hücumu həyata keçirib.

Olaylar.az xəbər verir ki, məlumatı "Əl-Hədət" televiziyası yayıb. Məlumata görə, ABŞ Hərbi Hava Qüvvələri Suriyanın şimalında yerləşən "İŞİD-in sığınacaqlarına və qərargahlarına yeni hücum dalğası həyata keçirib". Əsas zərbələrin Deyr əz-Zor əyalətindəki İŞİD mövqelərinə yönəldiyi bildirilir.

Bundan əlavə, "Əl-Hədət"in məlumatına görə, ABŞ təyyarələri Homs və Rakka əyalətlərinin kənd yerlərindəki terrorçu bazalarına, eləcə də Palmira tarixi-memarlıq kompleksinin kənarında yerləşən Tadmor şəhəri yaxınlığına hava hücumları həyata keçirib. Məhz bu ərazidə 13 dekabrda iki ABŞ Milli Qvardiyası əsgəri və bir amerikalı tərcüməçi öldürülüb.

Kanalın məlumatına görə, İŞİD-ə qarşı gecə əməliyyatı başlamazdan əvvəl ABŞ ordusu Suriyanın şimal əyalətlərində ən azı 50 İŞİD hədəfini müəyyən edib. Əvvəllər müəyyən edilmiş bütün terrorçu mövqelərinin vurulub-vurulmadığı barədə hələlik məlumat yoxdur.

Suriyanın şimalında bombardmanlar hazırda dayandırılıb, lakin ABŞ Hərbi Hava Qüvvələrinin təyyarələri ərazidə patrul xidməti davam etdirir. (Musavat.com)