“Paşinyan dəstək toplamağa ümid edir, amma...”
Ermənistan və Azərbaycan sülh sazişinin mətnini yekunlaşdırıblar, lakin rəsmi Bakı bəyan edib ki, İrəvan konstitusiyasını dəyişməyincə sənədi imzalamayacaq. Ermənistan yeni konstitusiya layihəsi üzərində işləyir. Xarici tərəfdaşlar müqavilənin imzalanmasına stimul yaratmalı, xüsusən də sərhədlər açıldıqdan sonra zəruri olacaq nəqliyyat infrastrukturuna investisiya qoymalıdırlar.
Olaylar.az xəbər verir ki, bu barədə crisisgroup.org saytının təhlilində qeyd olunur.
"Bakı və İrəvan kompromis axtarmalıdırlar ki, saziş yalnız konstitusiya referendumundan sonra mümkün olsun. "Orta mövqe" kimi həll müqavilənin imzalanması, amma ratifikasiyanın Ermənistan Konstitusiyası dəyişdirilənədək təxirə salınması ola bilər", - deyə yazıda bildirilir.
Yazı müəlliflərinin iddiasına görə, Azərbaycan üçün belə kompromis sərfəli olardı, çünki referendumun nəticələri qeyri-müəyyəndir.
"Ermənistan həmçinin (tam aydın olmasa da) konstitusiya dəyişikliklərinə hazır olduğunu bildirib, amma yalnız 2026-cı ildə planlaşdırılan referendumdan sonra. Yeni konstitusiyanın qəbulunu isə Paşinyan təkbaşına edə bilməz - bu qərarı seçicilər təsdiqləməlidirlər.
Əslində, hökumət vətəndaşlardan ölkənin məğlubiyyətini təsdiqləməyi xahiş edəcək. Bu isə 2020 və 2023-cü illərin məğlubiyyət travmasının hələ təzə olduğu vaxtda baş verir. Seçicilərin məyusluğu danışıqlarda Azərbaycanın "ermənilərdən nəsə alıb, əvəzində heç nə verməməsi" təsəvvürünü gücləndirir. Paşinyan isə son iki ildə çıxışları, sosial şəbəkələrdə kampaniyaları və milli simvollarda dəyişikliklər yolu ilə özünü yeni "real Ermənistan" konsepsiyasının qurucusu kimi təqdim etməyə çalışır. Bu yanaşma, məsələn, artıq Ağrı dağını "itirilmiş torpaq" kimi görməmək və Qarabağı geri qaytarmaq planlarından imtina etmək deməkdir.
Bu cəhdlər daxili-siyasi xarakter daşıyır və əvvəlki hökumətlərin (habelə indiki müxalifətin) "tarixi Ermənistan" ideologiyasına qarşı qoyulur. Bundan əlavə, Paşinyan güzəşt siyasətinə tənqidi yanaşan erməni diaspor qruplarını da nəzərə almır.
Ermənilərin qorxularının mərkəzində "Zəngəzur dəhlizi" layihəsi də dayanır.
Nikol Paşinyan dəstək toplamağa ümid edir, amma onun siyasi kapitalı azalır. "Vətəndaş sazişi" partiyası apreldə keçirilən yerli seçkilərdə məğlub olub, bu isə ümummilli seçkilər öncəsi xəbərdarlıq kimi qiymətləndirilir. Paşinyan hələ də Ermənistanda ən populyar siyasətçi sayılsa da, əsasən alternativlərin olmamasına görə belədir.
Avqustda ABŞ-ın vasitəçiliyi ilə əldə olunmuş razılaşma Vaşinqtonun danışıqlara görə məsuliyyətini artırıb", - deyə yazının sonunda qeyd olunub.