Ukraynalıların 75 faizi: Atəşkəs yalnız təhlükəsizlik zəmanəti ilə mümkündür

Ukrayna vətəndaşlarının böyük əksəriyyəti ölkənin yalnız beynəlxalq təhlükəsizlik zəmanətləri təmin olunduğu halda atəşkəsə razı ola biləcəyini düşünür. Bu barədə "Reytinq" sosioloji qrupunun avqustun sonunda keçirdiyi sorğunun nəticələri göstərir.

Musavat.com xəbər verir ki, sorğuya görə, respondentlərin 75 faizi atəşkəsə ABŞ və Avropa ölkələrindən təhlükəsizlik zəmanəti şərti ilə razı olduqlarını bildirib. 19 faiz isə heç bir halda atəşkəsin mümkün olmadığını deyib. 3 faiz şərtsiz atəşkəsi dəstəkləyib, digər 3 faiz isə cavab verməkdə çətinlik çəkib.

Ən vacib zəmanətlər sırasında ordunun maliyyələşdirilməsi və silah təchizatı (52%), müttəfiqlərin yeni hücum olacağı təqdirdə döyüşlərə qatılmaq öhdəliyi (48%), beynəlxalq qüvvələrin hava və dəniz məkanını patrul etməsi (44%) göstərilib.

Respondentlərin yalnız 12 faizi Rusiya ilə müqavilə imzalanmasını vacib sayıb.

Ümumilikdə, iştirakçıların 59 faizi atəşkəsin və kompromisin tərəfdarıdır, 20 faizi Donbas və Krımın qaytarılmasına qədər müharibənin davamını istəyir, 13 faizi isə 2022-ci il fevralın 23-nə olan sərhədlər üzrə münaqişənin dondurulmasına razıdır.

Sorğuda həmçinin kompromis axtarışında digər ölkələrin iştirakına dair fikirlər də öyrənilib: iştirakçıların 62 faizi bu prosesə beynəlxalq tərəfdaşların qoşulmasını vacib sayıb, 20 faizi birbaşa Rusiya ilə danışıqların tərəfdarı olduğunu bildirib, 11 faizi isə ümumiyyətlə danışıqlara qarşı çıxaraq bütün ərazilərin azad olunmasına qədər mübarizənin davam etməsini istəyib.