Ukrayna yenə Rusiya hava məkanında xaos yaratdı: Daha bir neft emalı zavodu alovlar içində

Ötən gecə Ukraynanın hücum dronları Rusiya hava limanlarında böyük xaos yaradıb.

Olaylar.az yerli mətbuata istinadən xəbər verir ki, gecə boyu Samara, Soçi, Kaluqa, Nijnekamsk, Volqaqrad, Kazan, Saratov, Tula aeroportları fəaliyyətini dayandırmalı olub.

Ukrayna dronlarının əsas hədəfləri Rusiya hərb maşınını təmin edən müəssisələrdir. Bu hədəflərdən daha birinə - Krasnodar Neft Emalı Zavoduna uğurlu zərbə endirilib. Rusiya tərəfi "zavod ərazisinə dron qalıqları"nın düşdüyünü iddia etsə də, Telegram kanallarda yayılan görüntülərdən zavoda birbaşa dronla zərbə endirildiyi aydın olur.

Zavodda güclü yanğın başlayıb, Rusiya rəsmiləri hadisə yerində yanğın-xilasetmə qrupları, xüsusi və fövqəladə hallar xidmətinin əməkdaşlarının işlədiyini deyirlər. Neft emalı zavodunun işçiləri təxliyə edilib.

Xatırladaq ki, avqustun 28-nə keçən gecə Krasnodar diyarının Severski rayonunda Afipski Neft Emalı Zavodunda da PUA-nın hücumu nəticəsində yanğın başlayıb və davam edir. Yanğının söndürülməsinə 63 nəfər canlı qüvvə və 26 texnika cəlb olunub.