ABŞ Ukraynaya yarım milyardlıq silah satışını təsdiqlədi

Dövlət Departamenti Ukraynaya Starlink peyk rabitəsi xidmətlərinin potensial təminatını və müvafiq avadanlığın 150 milyon dollara satışını təsdiqləyib.

Olaylar.az xəbər verir ki, məlumatı Pentaqonun hökumətlərarası müqavilələr əsasında xaricə hərbi texnika və silahların tədarükünə cavabdeh olan Təhlükəsizlik Əməkdaşlıq Agentliyi açıqlayıb.

Bildirilir ki, Amerika tərəfi Ukraynaya "ABŞ hökuməti və podratçılar tərəfindən mühəndislik, texniki və logistika xidmətləri", eləcə də lazımi avadanlıq da daxil olmaqla, digər dəstək göstərməyə hazırdır.

Sənəddə vurğulanır ki, təklif olunan satış Ukraynanın müdafiə potensialını gücləndirəcək.

ABŞ Dövlət Departamenti həmçinin Ukraynaya Patriot hava hücumundan müdafiə raket sistemləri (SAM) üçün 179,1 milyon dollara potensial maddi-texniki dəstək xidmətlərinin göstərilməsini təsdiqləyib. Bildirilir ki, "təklif edilən satış ABŞ-ın xarici siyasəti və milli təhlükəsizlik məqsədlərinə uyğun olacaq".

Dövlət Departamenti Danimarkaya Patriot hava hücumundan müdafiə raket sistemlərinin (SAM) və əlaqədar logistikanın potensial satışını 8,5 milyard dollara təsdiqləyib. Qeyd olunur ki, Danimarka səlahiyyətliləri daha əvvəl ABŞ-dan 36 GEM-T ələkeçirən raket, 20 PAC-3 ələ keçirən raket, iki AN/MPQ-65 radarı, iki atəşə nəzarət postu və komplekslə bağlı digər sistemlər tələb etmişdi.

Agentliyin açıqlamasına əsasən Danimarka bu silahlardan "NATO müttəfiqlərini və tərəfdaşlarını qorumaq üçün" istifadə edəcək. Amerika tərəfinin hesablamalarına görə, bu sistemlərin hazırlanması, yerləşdirilməsi və sınaqdan keçirilməsi üzrə işlər ən azı 7 il çəkə bilər.

Hər üç qərar təsdiq üçün Konqresə göndərilib.

Bundan əvvəl Dövlət Departamenti Ukraynaya 815 milyon dollarlıq uzaqmənzilli raketlərin satışını təsdiqləyib.