Aİ Hindistan və Çinin neft emalı zavodları və limanlarına qarşı sanksiyalar tətbiq edə bilər - ÖZƏL

Olaylar.az xəbər verir ki, Euractiv portalının məlumatına görə, Avropa İttifaqının (Aİ) xarici işlər nazirləri Kopenhagendə keçiriləcək qeyri-rəsmi görüşdə Hindistan və Çinə məxsus neft emalı zavodları, limanlar və təşkilatlara qarşı sanksiyaların tətbiqini müzakirə edəcəklər.
Müzakirələrdə əsas mövzu Rusiyanın "kölgə donanması" vasitəsilə mövcud məhdudiyyətləri aşdığı iddiaları olacaq. Bu səbəbdən, Aİ "Rusiya ilə əməkdaşlıq edən vasitəçilərin" siyahısını əhəmiyyətli dərəcədə genişləndirməyi planlaşdırır. Eyni zamanda, gəmilərin qeydiyyatı ilə bağlı xidmətlər göstərən özəl operatorların da sanksiyalar siyahısına salına biləcəyi vurğulanır. Məlumata görə, Brüssel bu addımı qismən ABŞ-nin təzyiqi altında atır. Avqustun 6-da Vaşinqton Hindistanın Rusiyadan neft və neft məhsulları almasına cavab olaraq Nyu-Dehliyə qarşı ticarət rüsumlarını 50 faizə qədər qaldırmışdı. Qeyd edək ki, Aİ diplomatiyasının rəhbəri Kaya Kallas bir müddət əvvəl Ukraynanın daha da militarizasiya ediləcəyini bildirərək, Aİ ölkələrini Rusiya enerji sektoruna qarşı ikinci dərəcəli sanksiyalar tətbiq etməyə çağırmışdı. Bu, Aİ rəsmilərindən birinin ilk dəfə açıq şəkildə ikinci dərəcəli sanksiyalara dəstək göstərməsi kimi qiymətləndirilir. Rəsmi olaraq Brüssel həmişə bu addıma qarşı çıxsa da, reallıqda Aİ artıq uzun müddətdir Rusiya ilə əməkdaşlıq edən ölkə və təşkilatlara qarşı sanksiyalardan istifadə edir.