Hakan Fidan: Rusiya bəzi tələblərindən imtina edib, sammitə hazırlıq gedir – ÖZƏL

Olaylar.az xəbər verir ki, Türkiyənin xarici işlər naziri Hakan Fidan bildirib ki, Alyaskada keçirilən Rusiya-ABŞ danışıqlarında müəyyən prinsiplər üzrə razılıq əldə olunub və onların həyata keçirilməsi üçün sammit hazırlanır. Onun sözlərinə görə, Rusiya tərəfi əvvəlki bəzi tələblərindən geri çəkilib.

"Əvvəllər rusların məqsədi dörd vilayətin inzibati sərhədlərini tam nəzarətə götürmək idi. İndi isə bundan imtina ediblər və bir sahə istisna olmaqla, təmas xəttində qalmağa razıdırlar", - deyə Fidan vurğulayıb.

Nazirin sözlərinə görə, söhbət Donetsk vilayətinin qalan 25-30 faizinin Rusiyaya verilməsindən gedir. Zaporojye və Xerson vilayətlərində isə rus qoşunları mövcud təmas xəttində qalacaq.

Fidan əlavə edib ki, bu razılaşmaların təhlükəsizlik mexanizmi ilə təmin olunması mühüm əhəmiyyət daşıyır və müharibənin sona çatmasına yol aça bilər:
"Əgər ümumi təhlükəsizlik mexanizmi yaradılarsa, onun keyfiyyəti fərqli olacaq. Bu istiqamətdə danışıqlarımız davam edir", - deyə o, Türkiyənin nizamlanmada əsas oyunçu rolunu vurğulayıb.