ABŞ-nin xüsusi elçisi Moskva səfərində protokol qaydalarını pozub – ÖZƏL

Olaylar.az xəbər verir ki, ABŞ prezidentinin xüsusi elçisi Stiv Vitkoff Moskvada Rusiya prezidenti Vladimir Putinlə görüşdə protokolu pozaraq, yanında adətən qeydləri aparan Dövlət Departamenti nümayəndəsi olmadan iştirak edib. Bu səbəbdən yaranan çaşqınlıq Vitkoffun Kremlin mövqeyini yanlış təqdim etməsinə gətirib çıxarıb, - deyə Reuters mənbələrə istinadən yazır.

Məlumata görə, Vitkoff 6 avqustda Moskvadakı görüşdən sonra ABŞ prezidenti Donald Trampa bildirib ki, guya Putin müharibəni dayandırmaq üçün ciddi ərazi güzəştlərinə hazırdır. Bunun ardından Tramp Putinlə sammit keçirməyə razılaşıb.

Daha sonra Vitkoff Avropalı liderlərlə söhbətdə iddia edib ki, Putin Zaporojye və Xerson vilayətlərindən qoşunları çıxarmağa, əvəzində isə Kiyevin Donetsk və Luqanskdan imtina etməsinə hazırdır. Bu açıqlama "şok effekti" doğurub, çünki Putinin mövqeyi ilə ziddiyyət təşkil edirdi.

Lakin ertəsi gün Vitkoff bəyan edib ki, Kreml əslində qoşun çıxarmaq barədə təklif irəli sürməyib, sadəcə Qərbdən Zaporojye və Xersonun Rusiyanın bir hissəsi kimi tanınmasını tələb etməyəcəyini bildirib.

Reuters yazır ki, bəzi amerikalı rəsmilər, o cümlədən Trampın Ukrayna üzrə müşaviri Kit Kellog, Vitkoffun Moskvadan ziddiyyətli məlumat gətirməsindən narazı qalıb.