Aİ Livan ordusunun təlim və dəstəyini mümkün edir - ÖZƏL

Avropa İttifaqı Livan Silahlı Qüvvələrinin təlim və dəstək proqramı üzərində işləməyi nəzərdən keçirir. Olaylar.az xəbər verir ki, bu barədə İrlandiyanın xarici işlər naziri Saimon Harris bildirib. Onun sözlərinə görə, məqsəd ölkənin təhlükəsizliyini gücləndirmək və həm xarici, həm də daxili çağırışlarla mübarizə aparmaq üçün hökumətin imkanlarını artırmaqdır.
Harris qeyd edib ki, Aİ əvvəllər Ukrayna və Bosniyada oxşar dəstək missiyaları həyata keçirib və indi Livan üçün də bu imkanları qiymətləndirmək niyyətindədir. Nazir əlavə edib ki, yaxın həftələrdə Aİ tərəfindən missiyanın həyata keçirilməsi üçün sənəd hazırlanacaq və bu, Livan ordusunun gücləndirilməsinə xidmət edəcək. Harris BMT Təhlükəsizlik Şurasının Livandakı Müvəqqəti BMT Sülhməramlı Qüvvələrinin (UNIFIL) mandatını 31 dekabr 2026-cı ilədək uzatmaq qərarını müsbət qiymətləndirib. O, Aİ ölkələrinin 2027-ci ilə qədər bu müddəti Livan ordusunun yenilənməsinə yardım üçün istifadə etməli olduğunu vurğulayıb. Qeyd edək ki, İrlandiya uzun illərdir UNIFIL-də iştirak edir və bu müddət ərzində Livanda 47 hərbi qulluqçusunu itirib.
Eyni zamanda, 5 avqustda Livan hökuməti ölkədəki bütün silahlı qrupların, o cümlədən "Hizbullah"ın mərhələli şəkildə silahsızlandırılmasını nəzərdə tutan planın hazırlanmasını təsdiqləyib. ABŞ və İsrailin tələblərinə uyğun hazırlanacaq planın 2 sentyabrda kabinet iclasında təsdiqlənməsi gözlənilir. Plan çərçivəsində şiə qruplar raket arsenalının 50%-ni Livan ordusuna təhvil verdiyi halda, İsrail 2024-cü il münaqişəsindən sonra nəzarətində qalan beş sərhəd rayonundan qoşunlarını çıxaracaq.