Levon Zurabyan Paşinyanı Konstitusiyanı pozmaqda ittiham etdi – ÖZƏL

Olaylar.az xəbər verir ki, Ermənistan Milli Konqresinin sədr müavini Levon Zurabyan sosial şəbəkədə paylaşım edərək Baş nazir Nikol Paşinyanın açıqlamalarını qanun pozuntusu kimi qiymətləndirib.

Zurabyan Ermənistan Konstitusiyasının 42-ci maddəsini və "Hökumətin strukturu və fəaliyyəti haqqında" qanunun müvafiq müddəalarını xatırladaraq bildirib ki, hər kəsin fikir azadlığı hüququ var və hökumət qərarları kollegial səsvermə ilə qəbul edilməlidir.

O, Paşinyanın "Hökumətdə mənim mövqeyimə zidd mövqedə olan heç kim ola bilməz. Hökumət - bu, mənəm. Əgər kiminsə mənim mövqeyimə zidd mövqeyi varsa, istefa versin, əks halda mən özüm onları uzaqlaşdıracağam" sözlərini sitat gətirib.

Zurabyan qeyd edib ki, bu bəyanat Ermənistan Cinayət Məcəlləsinin 441-ci maddəsində nəzərdə tutulan cinayət əlamətləri daşıyır. O, Baş Prokurorluğu bu açıqlamanı cinayət tərkibli əməl barədə məlumat kimi qəbul etməyə və cinayət işi açmağa çağırıb.

Cinayət Məcəlləsinin həmin maddəsi vəzifə səlahiyyətlərindən sui-istifadə və onların hüdudlarını aşma hallarına görə cərimə, vəzifədən məhrumetmə, azadlığın məhdudlaşdırılması və ya həbs cəzası nəzərdə tutur.