Aİ nazirlərinin ikigünlük görüşü başlayır: Rusiyaya qarşı sanksiyalar, Ukraynaya dəstək...
Bu gündən Avropa İttifaqı xarici işlər və müdafiə nazirlərinin Rusiyaya qarşı yeni sanksiyalar, Ukraynaya silah tədarükü və münaqişədən sonra Ukraynaya "təhlükəsizlik təminatları"nı müzakirə etmək üçün Kopenhagendə iki günlük qeyri-rəsmi görüşü başlayır.
Olaylar.az xarici agentliklərə istinadən xəbər verir ki, qeyri-rəsmi olduğundan görüşün rəsmi gündəliyi yoxdur. Müzakirələr mahiyyətcə sərbəst formadadır: hər bir nazir özünü və ya bütövlükdə Avropanı maraqlandıran istənilən mövzunu qaldıra bilər. Brüsseldə bu görüşlər 1974-cü ildə ilk dəfə bu formatın sınaqdan keçirildiyi Köln yaxınlığındakı qaladan sonra "gymnich" adlanır.
Bu dəfəki görüşün xüsusi qonaqları qismində NATO-nun baş katibi Mark Rutte və Avropa Parlamentinin Xarici Əlaqələr Komitəsinin rəhbəri Devid Makallister çıxış edəcək. Hər ikisi artıq nazirləri Rusiyaya təzyiqi artırmağa və Avropa İttifaqının hərbi gücünü artırmaq üçün hər cür səy göstərməyə çağıracaqlarını bəyan ediblər.
Görüş qeyri-rəsmi xarakter daşısa da, adətən, Aİ-nin növbəti mərhələ üçün siyasətinin formalaşmasına böyük təsir edir. Bu dəfəki görüşdə Avropa Komissiyasının Rusiyanın enerji və bank sektorlarına qarşı təklif etdiyi yeni sanksiyaları əhatə edən 19-cu sanksiya paketi müzakirə olunacaq. Yeni paketə Rusiya aktivləri hesabına Ukraynaya daha çox hərbi yardıma imkan verəcək addımlar, həmçinin Rusiya ilə sanksiyalı malların ticarətini aparan ölkələrə qarşı ikincili addımlar daxildir.
Avropalı nazirlər münaqişədən sonrakı dövr üçün Ukrayna üçün təhlükəsizlik təminatlarını müzakirə etməyə hazırlaşırlar. Müzakirələrdə əsas diqqət Ukrayna Ordusunun hərtərəfli dəstəklənməsi, Ukraynanın hərb sənayesinə investisiyaların artırılması və sair daxildir.
Nazirlər həmçinin qoşunlarının Ukraynaya göndərilməsi imkanlarını müzakirə etməyə davam edəcəklər. Bu müzakirə Brüssel ofislərində ABŞ prezidenti Donald Tramp, Vladimir Zelenski və bir qrup Avropa lideri arasında avqustun 18-də Vaşinqtonda keçirilən görüşdən sonra artıq 10 gündür ki, gedir, lakin hələlik dəqiq təfərrüatlar ortaya çıxmayıb.