Rubio Meksika və Ekvadora gedir – Venesuela ətrafında həlqə daraldılır

ABŞ dövlət katibi Marko Rubio sentyabrın 2-4-də Meksika və Ekvadora səfər edəcək.

Olaylar.az xəbər verir ki, məlumatı Dövlət Departamentinin mətbuat xidmətinin rəis müavini Tommi Piqott açıqlayıb. Bildirilir ki, Rubio hər iki ölkənin səlahiyyətliləri ilə narkotik kartelləri ilə mübarizəni müzakirə edəcək.

Piqottun sözlərinə görə, Rubio "ABŞ üçün prioritet olan məsələləri həll etmək üçün sentyabrın 2-4-də Meksika və Ekvadora səfər edəcək": "Bunlara kartelləri məhv etmək, fentanil qaçaqmalçılığı və qeyri-qanuni miqrasiyanı cilovlamaq, ticarət kəsirlərini azaltmaq, iqtisadi rifahı təşviq etmək və bu qitədən kənarda olan zərərli aktorlarla mübarizə aparmaq üçün sürətli və qətiyyətli tədbirlər daxildir".

Həmçinin qeyd olunur ki, Rubionun regiona səfəri ABŞ-ın "öz sərhədlərinin qorunmasına və ölkəyə qarşı narkotik və terror təhlükələrinin zərərsizləşdirilməsinə" sadiqliyini nümayiş etdirir.

2025-ci ilin avqustun əvvəlində Vaşinqton administrasiyası narkotik kartelləri ilə mübarizə əməliyyatı çərçivəsində Venesuela sahillərinə ABŞ Hərbi Dəniz Qüvvələrinə məxsus üç esmines (USS Gravely, USS Jason Dunham və USS Sampson) göndərib. Əraziyə USS Newport News nüvə sualtı qayığının və idarə olunan raket kreyseri USS Lake Erie-nin yerləşdirildiyi də bildirilib. "The New York Times" qəzetinin yazdığına görə, ABŞ prezidenti Donald Tramp Latın Amerikası narkotik kartellərinə qarşı hərbi güc tətbiq etməyə başlamaq üçün göstəriş imzalayıb.