İrəvanda daha bir sorğu: Ermənilər kimə səs verəcək?

Ermənistanda növbədənkənar parlament seçkisindən öncə daha bir sorğunun nəticələri açıqlanıb.

Sorğunu Beynəlxalq Respublikaçılar İnstitutu keçirib. Sorğunun nəticəsinə əsasən, əhalinin 67%-i Paşinyanın rəhbəri olduğu Vətəndaş Müqaviləsi Partiyasını dəstəkləyəcəklərini bildiriblər. 10% şəxs İşıqlı Ermənistan, 9% şəxs Çiçəklənən Ermənistan, 3% Sasna Çrer, 2% Respublikaçılar, 2% isə Daşnaksütyun partiyasına səs verəcəklərini deyib.

Ermənilər üçün Nikol Paşinyan hələ də ən sevimli ictimai xadim olaraq qalıb. Ermənilərin 82%-i Paşinyanı sevdiyini bildirib. Ondan sonrakı yeri 81%-lə Armen Sərkisyan, 77%-lə Milli Təhlükəsizlik Xidmətinin rəhbəri Artur Vanetsyan tutub.

Ermənistanda sürətli siyasi dəyişiklikləri 63% şəxs dəstəkləyib. 73% erməni isə Ermənistanın doğru yolda olduğunu, 81% isə ölkədəki situasiyanın gələcəkdə daha da yaxşılaşacağına inandığını ifadə edib.

Ermənilər həmçinin Paşinyandan daha çox iş yerlərinin yaradılması, sosial-iqtisadi problemlərinin həll edilməsini, təqaüdlərin və maaşlarının artırılmasını gözlədiklərini deyiblər.

Qeyd edək ki, bundan öncə "Qallup" şirkəti Ermənistanda sorğu keçirmişdi. Sorğuya əsasən, Paşinyanın partiyasını 68,3% şəxsin dəstəklədiyi üzə çıxmışdı. Ondan sonrakı yerlərdə Çiçəklənən Ermənistan (6,7%), Respublikaçılar (1,5%), İşıqlı Ermənistan (1,2%) və Daşnaksütyun (1%) partiyaları qərarlaşmışdı.

axar.az