“Sistem dəyişməlidir” - İYNƏ -YUMOR
Kefinin duru vaxtında icazəsiz aksiyaya qatılan Asim Mollazadəni polis tutur. Onu şöbəyə gətirirlər. Polis kapitanı ironiya ilə deyir:
- Orda camaatla danışırdın ki, "Sistem dəyişməlidr". Ə, hansı sistem?! Nədən danışırsan?
Asim vəziyyətdən çıxmaq üçün yazıq sifət alıb deyir::
-Vallah mən siyasi sistemi demirdim. Dostumun arvadı xəstədir, danışırdı ki, vəziyyəti pisdir. Mən də dedim ki, sistem qoyublar, onu dəyişmək lazımdır.
Facebookda ağız ədəbiyyatı
(Bayatılar)
Əzizim facebookda!
Üz gördüm facebookda,
Oğlanlara söz atan,
Qız gördüm facebookda.
*** *** ***
Əzizinəm burda yat
Gecə-gündüz burda yat,
Oğlanların tək sözü,
"Başına dönüm, dostluq at".
*** *** ***
Əzizinəm çata gəl
Divarda yazma, çata gəl
Şəkillərimi like elə,
Ondan sonra çata gəl.
(Alqışlar)
- Statusuna 1000 like gəlsin!
- İnboxundan mesajları oxuyub qurtara bilməyəsən.
(Qarğışlar)
- Səni görüm, şəklinə like gəlməsin.
- Statusunu özün yazıb, özün oxuyasan.
Ağız ədəbiyyatı
Siyasətçilər, deputatlar və digər tanınmış şəxslər haqqında yaranmış şifahi xalq ədəbiyyatı nümunələri.
Mən aşiq Ərdəbilə
Təbrizə, Ərdəbilə,
Onu Güney ucaltdı
Nadandı-çətin bilə!
(Mahmud Əhmədinecad barədə Təbrizdə yaranıb)
Əzizim dilbiləndi
Arifdi, dilbiləndi.
Harda pul varsa, cumar
Elə bil iybiləndi.
(Əli Əkbər Vilayəti barədə Marağada formalaşıb)
Mən aşiqəm, yaz gələ
Qış sovuşa, yaz gələ.
Sosdemlər istəmir ki
Firqəyə Ayaz gələ.
(Ayaz Mütəllibov haqqında ASDP-də yaranıb)
"Yerini deyim, balıqları tutsunlar"
Bir gün dəlixanaya yoxlama gəlir. Yoxlama dəliləri yığıb bir sual verir:
- Deyin görüm, vannada balıq tutmaq olarmı?
Hamı deyir ki, olar. Təkcə biri deyir olmaz. Yoxlama həmin dəlini azad edir.
Dəli evə gələndə valideynləri soruşur:
- Səni nə yaxşı buraxdılar?
Dəli dillənir:
- Soruşdular ki, vannada balıq tutmaq olar?
Valideynləri:
- Bəs sən nə dedin, ağıllı balam?
Dəli təmkinlə:
- Dəli-zad deyiləm ki, deyim yerini, onlar da balıqları tutsunlar...
"Nə qədər ki sənin kimilər məşqçidi..."
Bir gün bir türk, rus, bir də azərbaycanlı gəlir mələyin yanına. Türk soruşur ki, biz futbolda nə vaxt dünya çempionu olacağıq ? Mələk:
- Türkiyə yığması 50 ilə dünya çempionu olacaq.
Türk başlayır ağlamağa ki, mən o günü görməyəcəm.
Sonra rus soruşur:
-Bəs biz nə vaxt çempion olacağıq?
Mələk:
-100 ilə Rusiya yığması da çempion olacaq.
Rus da başlayır ağlamağa, mən o günü görməyəcəm.
Nəyahət, azərbaycanlı (böyük ehtimalla bu, "Neftçi"nin baş məşqçisi Böyükağa Hacıyev olur) soruşur ki, bəs bizim milli nə vaxt çempion olacaq? Bunu eşidən mələk dəsmal çıxarıb ağlamağa başlayır:
- Nə qədər ki sənin kimilər məşqçidi, mən o günü görməyəcəm.
"Böyüyəndə mən də, sənin kimi..."
Robert Köçəryanın oğlunun məktəbli vaxtlarıdır. Bir gün məhlədə oğlanlar ona "çurban" deyirlər. Oğlan ağlaya-ağlaya nənəsinin yanına gəlir:
- Nənə, çurban nə deməkdi?
Nənəsi balacanı sındırmamaq üçün deyir:
-Bala, çurban dalaşqan, hündürboy, yaraşıqlı oğlana deyirlər...
Bir az keçir, oğlan atasının yanına gəlib deyir:
- Ata, mən də böyüyəndə sənin kimi çurban olacağam.
"Mən çölə çıxaracam, sən ye"
Mayis Səfərli Moskvada restorana girir. Masa arxasında oturan Mayis görür ki, bir varlı kişi qəşəng yemək yeyir. Tez ofisiantı çağırıb deyir:
- Bax, mən də o kişinin yediyi yeməkdən yemək istəyirəm.
Mayisin üst-başından kasıb olduğunu yəqin edən ofisiant deyir:
-Yaxşı. Deməli, belə elə. Mən o kişiyə yaxınlaşıb deyəcəm ki, sizi bayırda çağırırlar. O çıxan kimi daraş, onun qabına, ye.
Bildiriş
Ümid Partiyası fanatlarının nəzərinə! Gələn aydan etibarən, Ümid Partiyasının gündəlik qəzetlərdən pulla aldığı səhifələrin adı "Ümid" olmayacaq. Səhifə daha çox fəallıq göstərən funksionerin adı ilə adlanacaq. Məsələn, görüşlərin sayından aslıı olaraq səhifələr "İqbal", "Nəsimi", "Bakir", "Taleh", "Ənvər", "Rafael" adlanacaq.
CXP hədələdi
"İynə" çapa gedərkən Cümhuriyyət Xalq Partyasının lideri Bədrəddin Quliyevdən faks almışıq. Bədrəddn bəy qəzetlərdə CXP-nin bərpa ediləcək Müsavatətrafı "Bizim Azərbaycan" blokuna qoşulacağı ilə bağlı xəbərləri təkzib edir və bildirir ki, belə bir şey yoxdur, ola da bilməz. Bədrəddin bəy sonda qəzəblə yazıb: "Bundan sonra kim cürət edib CXP boyda nəhəng partiyanın adını cırtdan partiyalar bloku ilə yanaşı çəksə, məhkəməyə veriləcək".
"Soğan bol olarsa, basılmaz vətən"
Rusiyada yaşayan soydaşımız, bazar əhli arasında nüfuz sahibi olan Söyün Sadıxov yeni partiyasını elan etməyə hazırlaşır. Ötən saylarımızda yazmışdıq ki, Söyün müəllimin partiyasının emblemində "Soğan və tərəzi" olacaq. Aldığımız məlumata görə, bu simvol təsdiq edilib. Hazırda işçi qrupu partiyanın devizini müəyyənləşdirir. Xatırladaq ki, Söyün Sadıxovun partiyasının devizi olaraq "Soğan bol olarsa, basılmaz vətən", "İnsanı bazar ucaldır", "Bazarla yüksəlin, azarla enməyin", "Soğanı sevin, unutmayın:onu bitirən vətən torpağıdır" sloqanları təklif edilir.
Kölgə kabineti
Eldar Namazovun rəhbərlik etdiyi piar mərkəzi prezident seçkilərinə hazırlaşan və yeni hərəkat yaratdığını elan etmiş Rüstəm İbrahimbəyovun kölgə kabinetini élan edib. Kabinetin bəzi üzvlərini təqdim edirik
Baş nazir-Fuad Poladov
Müdafiə naziri-Rasim Balayev
Daxili işlər naziri-Cabir İmanov
Xarici işlər naziri-Bəhram Bağırzadə
Təhlükəsizlik naziri-Vado Karovin
İqtisadiyyat naziri-Əbdülvahab Manafov
Milli Məclisin sədri-Ələsgər Məmmədoğlu
Kənd təsərrüfatı naziri-Köçəri Nağıbəyli
Təhsil naziri-Etibar Əiyev
Mədəniyyət və şadlıq evləri naziri-Səməd Səmədov
Rabitə naziri-Yaqub Eyyubov.
Kabinetin qalan üzvlərinin adları gizli saxlanılır.