İynə - Uzanmaq, yoxsa utanmaq? - YUMOR

Ötən sayımızda tanınmış psixoloqla müsahibədə yanlışlığa yol verilib. "Azərbaycan cəmiyyətində utanmaq problemi var" fikri korrektorun xətası üzündən belə verilib: "Azərbaycan cəmiyyətində uzanmaq problemi var".

"Qalina üçün gedirəm..."

Bədrəddin Quliyev bir gün xəlvətcə telefonla danışarkən evdəkilər eşidir.

• Kimdi bu Qalina? Bayaq danışanda dedin ki, Qalina üçün gedirəm...

Badri and-aman edir:

- Vallah, adam deyil! Dostumla danışırdım, dedi, hara gedirsən. Dedim, "Qalina-Blanka" almağa. Yanlış anlamısan.

Yanlışlıq

Son nömrələrimizin birində Azadlıq Partiyasının sədri Əhməd Orucla müsahibədə yanlışlığa yol verilib. Korrektorun xətası üzündən "Elşad Musayevi dəfələrlə balığa aparmışam" fikri belə gedib: "Elşad Musayevi dəfələrlə bazlığa aparmışam".

Onun mənliyi var

Oğlan qıza:
- Sən mənim olacaqsan! Mənim maşınım, evim, pulum, işim var! O isə çox kasıbdı. Heç nəyi yoxdu!

Qız:

- Sən səhv edirsən. O səndən qat-qat varlıdı. Çünki  onun səndən fərqli olaraq mənliyi var.

Mənzərə şəkli

"Ədalət" qəzetinin redaksiyası. Məsul katib Ceyhun Musaoğlunun yanına gəlib deyir:

- Cenqo, "Eyvandan görünən mənzərə" yazısına nə şəkil verim?

Kefi ala buludda olan Ceyhun:

- Mənzərə Sadıqovanın şəklini qoy.

Saxta dollar

Bir gün iki dəli söhbət edir:
-O gün yolda 1 dollar tapdım.
-Bəs hanı?
-Tulladım, əşi.
-Niyə?
-Saxta idi. Harda görülüb ki, 1 dolların üstündə iki sıfır olsun?

Atasının balası

Cəcur Sümərinlinin oğlunun tərbiyə aldığı bağça. Bağça müəlliməsi uşaqları bulvara gəzməyə aparır. Həmin gün meydanda parad olur. Müəllim iri texnikanı göstərib deyir:

-Baxın, uşaqlar. o uzun burun maşın tırtırdı...

Cəsurun 5 yaşlı oğlu:

- Müəllimə, o uzun burun tırtır deyil e, t-80 Tankıdır. O uzun da lüləsidi.

Onun bəlalı səhər yeməyi

Bir ingilis dilli siyasətçinin səhər yeməyi: "Səhər yuxudan durdum, mətbəxə keçdim. Bərk acam. Masanın üstündə iki armud gördüm. Götürüb boşqabda əzdim-əla! Üüstünə iki gavalı daha əzdim-super! Smetan da qatdım-yaxşı! Uşağa aldığım yoğurtu götürüb üstünə əlavə elədim (evdə heç kim yox idi, görmədilər)-super. Bir az bal qatdım-qəşəng! Bir az doşab əlavə etdim-pis deyil! 8 ədəd zeytunu da qarışdırdım-bəd deyil. Sonra bir az xama əlavə elədim-məncə yaxşıdı. Düşünürəm: bunu yesəm, dadından doymayacaq, mətbəxdən çıxmayacam. Amma yedim-dəhşət! İndi ayaqyolundan çıxa bilmirəm!

Cəmisi "5" aldım

Mayis Səfərli məktəbli oğlundan soruşur:

- A bala, bu gün neçə aldın?

Oğlu cəld dillənir:

• 5!
  - Ay sağ ol!
• Hansı fənnlərdən?

-  3 fənndən. Riyaziyyat-2, Həndəsə-2, ingilis dili-1. Cəmi-5.

"Çata bilsən, tutarsan"

Boksçu Vüqar Ələkbərov  rinqə çıxmazdan əvvəl əynindəki bahalı gödəkçəsini çıxarıb soyunub-geyinmə otağında asır və üstünə də yazır: "Oğurlasan səni tutacam!..İmza:Boks üzrə ölkə çempionu!" Yarış bitir, Vüqar qayıdanda gödəkçənisini tapmır, amma onun yerində bir kağız  tapır. Üstündə yazılır: "Çata bilsən tutarsan!..İmza:Qaçış üzrə dünya çempionu".

Astroloq proqnozu

"Qoroskop" qəzetinin redaksiyası. Telefon zəng çalır. Dəstəyi astroloq Səbuhi Rəhimli götürür:

- Alo, salam! Mən qəzetdəki elana görə zəng edirəm. Siz fala baxırsınız?
- Bəli!
- Bazar günü sizin yanınıza gəlmək olar?
- Yox.
- Niyə?

Səbuhi köks ötürür:
- Çünki şənbə günü yıxılıb qıçınızı sındıracaqsınız.

"Mən tez o yeməyi yeyərdim..."

Aktyor Anar Heybətov sevgilisi ilə dalaşır. Qız acıqla:

- Sən mənim ərim olsaydın, mən sənin yeməyinə zəhər tökərdim.
Anar qəzəblə:

-Sən də mənim arvadım olsaydın, mən tez o yeməyi yeyərdim ki, canım səndən  tez qurtarsın.

Avtobusda

Binəyə gedən marşrut. Sərxoş oğlan qarşıda dayanmış qıza toxunur. Qız:

• Ay uzunqulaq, üstümə yıxılma!

Oğlan etiraz edir:

- Bir az mədəni olun...

Qız:

- Çox hörmətli uzunqulaq, bir az o yana dayanın, üstümə yıxılırsız...

"Necə göndərim?"

Dəlicəsinə sevən qız sevgilisinə romantik  mesaj yazır:

-Yatırsansa yuxunu, gülürsənsə gülüşünü, ağlayırsansa göz yaşını göndər. Nə edirsənsə onu göndər...
Oğlan cavab yazır:
- Əzizim, yaşadığımız binanın kanalizasiyası tutulub, əlimdə məftil pisliklə əlləşirəm. Bunu sənə necə göndərim?

"Kirlisən, get yaxşı-yaxşı çim"
 

Yaşar Türkazər falçıda:

- Əlim qaşınır.

- Pul gələcək,

- Ayağım niyə qaşınır?

- Yol gedəcəksən.

- Qulağım nədən qaşınır?

- Biri səndən danışır.

Yaşar həkimdə:

- Doktor, əlim qaşınır...

- Sonra..

- Ayağım qaşınır.

- Sonra.

- Qulağım da qaşınır...

Həkim təmkinlə:

-Qardaş, kirdəndi də. Get yaxşı-yaxşı çim.
 

Müdhət qızı yoldan necə çıxardı?

Aktyor Müdhət Aydının Rusiyada yaşadığı günlərdi. Bir gün yaşadığı qadınla arası dəyir və qadın Muriki məıhkəməyəy verir. Məhkəmədə qadın deyir:

- Mənə o qədər söz vermişdi ki. Aldatdı. Yoldan çıxardı məni...

Hakim:

- Düz deyir?

Müdhət məzə ilə:

- Düz deyir-yoldan çıxarmışam. Bir gün gəlirdim, gördüm, içib, yolun ortasına uzanıb. Yoldan çıxardım ki, maşın vurmasın. Belə yoldan çıxarmışam. Suçdurmu?

Məhkəmədə

Qatil məhkəmədə. Hakim:

- Öldürülən şəxs sizin qaynananızdır?
- Bəli.
Hakim:

- Onu axırıncı dəfə harada görmüsüz?
Qatil:

- Snayperin nişangahında.

"Yalnız xoş sözlər..."

Azərbaycanın futbol üzrə yığma komandasının baş məşqçisi Berti Foqtsdan soruşurlar:

- Sizə, ildə 2 milyon manat verən AFFA haqqında nə danışa bilərsiz?

Foqts gülərüzlə:

- Yalnız xoş sözlər...