Azrbaycanın 15 şirkəti beynəlxalq sərgidə təmsil olunub

Məlumat verildiyi kimi, İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan məhsulları Birləşmiş Ərəb Əmirliklərinin Dubay şəhərində "Gulfood 2021" beynəlxalq ərzaq sərgisində nümayiş olunub. Dubayın Beynəlxalq Ticarət Mərkəzində təşkil olunan sərgidə 85 ölkədən olan şirkətlər öz məhsullarını təqdim edib. İqtisadiyyat Nazirliyindən "Olaylar"a bildirilib ki, Azərbaycanın 15 şirkətinin istehsal etdiyi pomidor, fındıq, balıq kürüsü, mineral sular, meyvə şirələri, limonad, qənnadı məmulatları, un məmulatları, çay, mürəbbə və digər məhsullar sərgiyə gələnlər tərəfindən böyük maraqla qarşılanıb. Azərbaycan şirkətləri yağ, çay, mineral sular və s. məhsulların Qırğızıstan, Özbəkistan, İraq, Yəmən, Liviya, BƏƏ və digər ölkələrə ixracına dair danışıqlar aparıblar. Artıq Azerbaijan "Fish Farm", "Şirin", "Ləzzət Biskvit Fabriki", "Ulduz Şokolad Fabriki" şirkətləri ilə BƏƏ şirkətləri arasında məhsul ixracına dair ilkin razılıq əldə olunub.