Laos Prezidentinin Azərbaycana rəsmi səfəri yeni mərhələnin əsasını qoyur-Özəl
"Cənab Prezident İlham Əliyevin oktyabrın 13-də Laos Xalq Demokratik Respublikasının Prezidenti cənab Thonqlun Sisulitin Azərbaycana rəsmi səfəri zamanı mətbuata verdiyi bəyanat ölkəmizin müstəqil, praqmatik və çoxşaxəli xarici siyasət strategiyasının növbəti təzahürüdür. Səfər Azərbaycan ilə Laos arasında uzun illər ərzində formalaşmış dostluq münasibətlərinin möhkəmləndirilməsi, qarşılıqlı etimadın daha da gücləndirilməsi və yeni əməkdaşlıq imkanlarının reallaşdırılması baxımından mühüm əhəmiyyət daşıyır". "Olaylar" xəbər verir ki, bunu Milli Məclisin deputatı Fatma Yıldırım deyib: "Möhtərəm Prezidentimizin rəhbərliyi ilə həyata keçirilən məqsədyönlü xarici siyasət ölkəmizin beynəlxalq mövqelərini möhkəmləndirməklə yanaşı, müxtəlif regionları təmsil edən dövlətlərlə qarşılıqlı faydalı tərəfdaşlığın genişlənməsinə də xidmət edir. Laos Prezidentinin Azərbaycana ilk rəsmi səfəri bu baxımdan xüsusi əhəmiyyət kəsb edir və ikitərəfli münasibətlərin inkişafında yeni mərhələnin əsasını qoyur.
Dövlət başçımızın bəyanatında vurğulandığı kimi, Azərbaycan ilə Laos arasında 30 ildən artıqdır davam edən diplomatik münasibətlər siyasi dialoq, beynəlxalq təşkilatlar çərçivəsində qarşılıqlı dəstək və həmrəylik ənənələri ilə səciyyələnir. Parlamentlərarası əlaqələrin inkişafı, hər iki ölkədə dostluq qruplarının fəaliyyət göstərməsi və hakim partiyalar arasında əməkdaşlığın mövcudluğu əlaqələrimizin müxtəlif istiqamətlərdə ardıcıl şəkildə genişləndiyini göstərir. İkitərəfli münasibətlərin inkişafında iqtisadi əməkdaşlığın genişləndirilməsi, ticarət dövriyyəsinin artırılması və qarşılıqlı investisiya imkanlarının reallaşdırılması da mühüm yer tutur.
Təhsil sahəsində əməkdaşlığın genişləndirilməsi də gələcəyə hesablanmış mühüm istiqamətlərdəndir. Vaxtilə iki mindən çox laoslu tələbənin Azərbaycanda təhsil alması xalqlarımız arasında mövcud tarixi əlaqələrin və humanitar əməkdaşlıq ənənələrinin göstəricisidir. Bu ənənənin bərpası, təqaüd imkanlarının yaradılması və tələbə mübadiləsinin genişləndirilməsi gələcək nəsillər arasında qarşılıqlı anlaşmanın möhkəmlənməsinə mühüm töhfə verəcək.
Dövlət başçımızın bəyanatında diqqət çəkən məsələlərdən biri də mina təhlükəsinə qarşı mübarizə sahəsində əməkdaşlıq perspektivləridir. Həm Azərbaycanın, həm də Laosa müharibələrdən miras qalmış mina problemi insan həyatı və sağlamlığı üçün ciddi təhlükə olaraq qalır. Ermənistanın işğalı dövründə Azərbaycan ərazilərində basdırılmış minaların yaratdığı ağır humanitar nəticələr ölkəmizin bu sahədə beynəlxalq əməkdaşlığa xüsusi önəm verməsini şərtləndirir. Təcrübə mübadiləsi, müasir texnologiyaların tətbiqi və mütəxəssislərin hazırlanması istiqamətində birgə fəaliyyət mina təhlükəsinin azaldılmasına xidmət edə bilər.
Əminliklə qeyd etmək olar ki, Azərbaycan ilə Laos arasında münasibətlərin inkişafı qarşılıqlı hörmətə, etimada və ortaq maraqlara əsaslanan əməkdaşlıq modelinin uğurlu nümunəsidir. Cənab Prezident İlham Əliyevin həyata keçirdiyi uzaqgörən siyasət nəticəsində Azərbaycan beynəlxalq tərəfdaşlıq əlaqələrini genişləndirir, yeni iqtisadi və humanitar əməkdaşlıq imkanları yaradır, ölkəmizin beynəlxalq nüfuzunu daha da möhkəmləndirir.
Hesab edirəm ki, Laos Prezidentinin Azərbaycana rəsmi səfəri zamanı əldə olunan razılaşmalar və müəyyənləşdirilən prioritetlər gələcəkdə konkret layihələrlə zənginləşəcək, dost ölkələrimiz arasında əlaqələrin daha da dərinləşməsinə və xalqlarımızın rifahına xidmət edəcəkdir".