Əfsanə İbrahimova: “Bakının diplomatik iradəsi Parisdə növbəti dəfə öz təsirini göstərdi” – ÖZƏL

"Fransanın paytaxtında Bakıda ağır cinayətlərə görə məhkum edilmiş şəxslərə "siyasi məhbus" don geydirməyə çalışan təşəbbüs, Azərbaycanın qətiyyətli və vaxtında verdiyi diplomatik cavab sayəsində istənilən nəticəni əldə edə bilmədi. Paris meriyasının təntənəli açılış mərasimindən imtina etməsi, sadəcə texniki bir addım deyil, Bakının prinsipial mövqeyinin Fransa rəsmiləri tərəfindən nəzərə alınmasının açıq göstəricisidir. Bu eyni zamanda Səfir Abdullayevanın fəallığı nəticəsidir".

Bu sözləri Olaylar.az-a açıqlamasında siyasi şərhçi Əfsanə İbrahimova deyib. Siyasi şərhçi bildirib ki, Azərbaycanın Fransadakı səfiri Leyla Abdullayevanın operativ və əsaslandırılmış müraciəti  Bakı-İrəvan arasında formalaşan sülh gündəliyinə istinad, mühakimə olunan şəxslərin hüquqi statusunun dəqiq izahı Paris rəhbərliyini geri addım atmağa vadar etdi. Bu, Azərbaycanın beynəlxalq arenada artıq passiv müşahidəçi deyil, öz haqlı mövqeyini qətiyyətlə müdafiə edən fəal subyekt olduğunu bir daha sübut edir. Bu mühüm qələbədir. Tənqidçilər sərginin özünün davam etdiyini vurğulaya bilər, lakin əsas mesaj aydındır - Fransa rəsmi dairələri artıq Bakının həssaslıqlarını görməzdən gələ bilmir. Bu, uzunmüddətli, sistemli diplomatiyanın bəhrəsidir və Azərbaycanın beynəlxalq nüfuzunun möhkəmlənməsinin növbəti təsdiqidir. Burada növbəti addımlar üçün möhkəm zəmin yaranır. Bu hadisə göstərir ki, Bakı frankofon məkanda da səsini eşitdirə bilir. Bundan sonra Azərbaycanın diplomatiyası bu tempi saxlayaraq, həm ikitərəfli kanallar, həm də beynəlxalq təşkilatlar (o cümlədən Frankofoniya strukturları) vasitəsilə mövqeyini daha da möhkəmləndirə bilər.

Səidə Ramazanova