Laçının azadlığı Azərbaycanın milli iradəsinin təntənəsidir- ÖZƏL
"Laçının azad edilməsi Azərbaycanın dövlətçilik tarixində mühüm hadisələrdən biri kimi xüsusi əhəmiyyət daşıyır. 2022-ci il avqustun 26-da Laçın şəhərinin nəzarətə götürülməsi uzun illər davam edən ayrılığın sona çatmasını təmin etdi. Prezident İlham Əliyevin xalqımıza çatdırdığı bu xəbər ölkənin hər yerində böyük sevinc hissi yaratdı. Şəhərin ardınca Zabux və Sus kəndlərinin də nəzarətə götürülməsi rayonun təhlükəsizliyi üçün mühüm imkanlar açdı. Bu səbəbdən avqustun 26-sı Laçınla bağlı tarixi yaddaşımızda xüsusi yer tutur". "Olaylar" xəbər verir ki, bunu YAP Şuşa rayon təşkilatının 14 saylı ərazi partiya təşkilatının sədri, Niyazi adına Şuşa şəhər Uşaq İncəsənət Məktəbinin direktoru Anar Əlizadə deyib:
"1992-ci ilin mayında Laçının işğal olunması ölkənin mürəkkəb siyasi şəraitdə olduğu dövrə təsadüf etmişdi. Həmin vaxt hakimiyyət uğrunda mübarizə dövlət idarəçiliyində ciddi problemlər yaratmışdı. Cəbhə bölgələrindəki hərbi qüvvələrin bir hissəsinin paytaxta yönəldilməsi müdafiə imkanlarını zəiflədən amillərdən idi. Laçının işğalı nəticəsində rayonun əhalisi məcburi köçkün vəziyyətinə düşdü və ağır məhrumiyyətlərlə üzləşdi. Sonrakı illər ərzində laçınlılar doğma torpaqlarına qayıtmaq ümidini qoruyub saxladılar.
İşğalın fəsadları rayonun iqtisadi və sosial həyatında uzun müddət özünü göstərdi. Yüzlərlə müəssisə, məktəb, xəstəxana və mədəniyyət obyekti dağıdılaraq istifadəsiz vəziyyətə salındı. Tarixi abidələrin zədələnməsi və məhv edilməsi Azərbaycan irsinə vurulan ciddi zərər idi. Təbii ehtiyatların qanunsuz istismarı Laçının iqtisadi potensialının talan edilməsinə səbəb oldu. Bu reallıqlar işğalın yalnız ərazi məsələsi olmadığını, həm də insanlara və milli-mədəni irsə qarşı ağır nəticələr doğurduğunu göstərdi.
Azərbaycanın hərbi gücü və siyasi iradəsi Vətən müharibəsində Laçının taleyini dəyişdi. 2020-ci ildə əldə olunan Qələbə nəticəsində işğalın aradan qaldırılması üçün tarixi şərait yarandı. Dekabrın 1-də Laçın rayonu üçtərəfli razılaşmanın müddəalarına əsasən Azərbaycana qaytarıldı. Güləbird, Səfiyan və Türklər kəndlərinin noyabrın 9-da azad olunması da bu istiqamətdə mühüm addım idi. 2022-ci ilin avqustunda Laçın şəhərinin nəzarətə götürülməsi Azərbaycanın əldə etdiyi nəticələri daha da möhkəmləndirdi.
Hazırda Laçında aparılan işlər Zəfərin yalnız hərbi nəticə ilə məhdudlaşmadığını nümayiş etdirir. Şəhərdə yaşayış məhəllələri, sosial infrastruktur və müasir ictimai obyektlər yaradılır. Prezident İlham Əliyevin rəhbərliyi ilə həyata keçirilən layihələr Laçının yeni simasının formalaşmasına xidmət edir. Doğma yurda köçən ailələrin sayı artdıqca şəhərin həyatında da canlanma müşahidə olunur. Laçının bugünkü dirçəlişi Azərbaycan dövlətinin milli iradəsinin və quruculuq gücünün göstəricisidir".