ABŞ qənimət məhkəmələrini bərpa edir – İran neft tankerlərinin ovlanmasına hazırlıq

Vaşinqton ələ keçirilən İran neft tankerlərinin ABŞ mülkiyyəti kimi tanınmasını asanlaşdırmaq üçün dəniz qənimət məhkəmələrini bərpa etməyi planlaşdırır.

Musavat.com Bloomberg-ə istinadən xəbər verir ki, qənimət məhkəmələri 18-ci və 19-cu əsrlərdə geniş yayılmışdı, lakin 1898-ci il İspaniya-Amerika müharibəsindən sonra praktik olaraq onlardan istifadə dayandırılıb, İkinci Dünya Müharibəsindən bəri heç vaxt istifadə olunmayıb. Onlar gəmilərin və yüklərin müsadirəsinin qanuniliyini müəyyən edərək tutulan əmlakın müsadirə edilməsi barədə qərar verir.

"Bloomberg" qeyd edir ki, ABŞ Ədliyyə Nazirliyi bu mexanizmə qayıtmağın ələ keçirilmiş İran neft tankerlərinin ABŞ müharibə qəniməti elan edilməsinə imkan verəcəyinə ümid edir. Hyustonda yaşayan ABŞ prokuroru Aaron Reitz Bloomberg-ə Ədliyyə Nazirliyinin "hazırda qənimət məhkəmələrini canlandırdığını" təsdiqləyib və onları "dəniz hüququnun qədim institutu" adlandırıb. Agentlik yazır ki, Vaşinqton planına nail olarsa, federal prokurorlar düşmən və ya neytral gəmilərdən gələn neft və digər yükləri ABŞ mülkiyyəti kimi tez bir zamanda tanıya biləcəklər. Müsadirə edilmiş yük daha sonra satıla bilər və əldə edilən gəlir ABŞ Xəzinədarlığına gedəcək.