Mənəvi böhrandan çıxış yolu "mənəviyyat institutlarının" bərpasından keçir-Özəl
"Müasir qloballaşma dalğası və rəqəmsal transformasiya informasiya axınını sürətləndirməklə yanaşı, cəmiyyətlərin daxili mənəvi strukturunu yenidən formalaşdırır. Təəssüflə qeyd etməliyik ki, bu gün sosial şəbəkə süzgəcindən keçən "yeni dəyərlər" gənc nəslin, xüsusən də gələcəyin ailə sütunu olacaq oğlan uşaqlarının psixoloji və mənəvi inkişafında ciddi aşınmalara yol açır. Milli identiklikdən uzaq, süni trendlərin diktə etdiyi bu "yeni ruh" bizi köklərimizdən qopmaq təhlükəsi ilə üz-üzə qoyur". Bunu "Olaylar"a Ana Vətən Partiyasının İctimaiyyətlə Əlaqələr Şöbəsinin rəhbəri İsmayıl Nadirxanlı deyib: "Bu mənəvi böhrandan çıxış yolu mütləq şəkildə "mənəviyyat institutlarının" bərpasından keçir. Bizim cəmiyyət üçün bu institutun ən ali məqamı Şəhid Anası fenomenidir. Lakin burada bir yanaşma xətasına yol verilir. Biz Şəhid Anasını yalnız dövlətin və cəmiyyətin qayğısına möhtac, "sosial yardım alan" statusunda dondururuq. Halbuki, fəlsəfi və sosioloji baxımdan bu xanımlar cəmiyyətin ən böyük mənəvi resursudur.
Övladını vətən naminə fəda etmiş bir ananın mətanətini, ləyaqətini və dik duruşunu sadəcə "kədər" çərçivəsinə sığışdırmaq olmaz. Onlar cəmiyyətin mənəvi restovrasiyasını yenidən quracaq, gənclərin yolunu işıqlandıracaq "Baş Məsləhətçi" missiyasını daşımalıdırlar. Bu gün yolunu azan gəncliyə ən təsirli nəsihəti akademik kürsülər verər yoxsa, məhz həyatın ən ağır imtahanından üzüağ çıxmış həmin analar?! Məncə bu barədə düşünməliyik.
Şəhid anasını passiv kədərdən aktiv ictimai müdrikliyə daşımaq həm onların özləri üçün psixoloji bir reabilitasiya, həm də milli mənəviyyatımız üçün bir nicat yoludur. Biz onlara "bizim sizə ehtiyacımız var" mesajını verməliyik. Çünki şəhid anasının sözü, sosial şəbəkələrin gənclərimizə sırıdığı hər hansı süni ideologiyadan qat-qat daha səmimi və qalıcıdı.
Gəlin, dəyərlərimizi qorumaq üçün bu mənəvi gücdən doğru istifadə edək. Cəmiyyəti yenidən inşa etmək üçün bizə lazım olan yeganə şey, o müqəddəs dualar və nəsihətlərin rəsmi bir instituta çevrilməsidir".