Yeni geosiyasi reallıqların başlanğıcı- ÖZƏL
"Prezident İlham Əliyevin Vaşinqton səfəri Azərbaycanın İkinci Qarabağ savaşından sonra yaratdığı reallığın dünyanın supergücü olan ABŞ tərəfindən qəbulu kimi dəyərləndirmək lazımdır. Bakı yaratdığı reallığın çağırışlarına uyğun olaraq bütövlükdə Cənubi Qafqazda dayanıqlı sülhün, sabitliyin, sıx inteqrasiya olunmuş əməkdaşlığa nail olmaqla yanaşı, Mərkəzi Asiya regionu, xüsusən də Qərblə Şərq, Şimalla Cənub arasında bir bağlantı rolunu oynayaraq regional əməkdaşlıq münasibətlərini formalaşdırıb". "Olaylar" xəbər verir ki, bunu siyasi şərhçi Mürtəza Bünyadlı deyib: "Ötən müddət ərzində Bakının yürütdüyü siyasətin ana xəttini yaradılan yeni status-kvonun geriyədönməz xarakter alaraq irəliyə aparılması təşkil edib. Bu istiqamətdə yürüdülən siyasət öz bəhrəsini verib və verməkdədir. Vaşinqton görüşü də bunun təzahürüdür. Vaşinqton səfəri bölgədə təkcə sülhə deyil, eyni zamanda Cənubi Qafqaz və Mərkəzi Asiya regionunda yeni geosiyasi reallıqların yaranması ilə yanaşı, yeni münasibətlərin inkişafına da töhfə verəcək. Çünki səfər zamanı İrəvanla Bakı arasında sülh sazişinin paraflanması deyil, eyni zamanda iqtisadi əməkdaşlıq münasibətlərinin inkişafı istiqamətində də sənədlər imzalanacaq. Bu da regionun inkişafına öz müsbət təsirini göstərəcək. Azərbaycan bu prosesdə də lokomotiv rolunu öz üzərinə götürüb prosesi irəli aparmaqdadır.
Görüşün həm də yekun sülh sazişinin imzalanmasına xidmət edəcək addımların atması ilə də yadda qalması gözlənilir. Belə ki, Ermənistan və Azərbaycan ATƏT-in Minsk qrupunun fəaliyyətinə xitam verilməsi, Zəngəzur dəhlizinin açılması, Ermənistan Konstitusiyasına dəyişikliklər kimi məsələlərdə də razılığa gələcəklər. Bu da yekun sülh sazişini sürətləndirən əsas amildir. Əgər Ermənistan tərəfi bu üç məsələni həll edərsə, o zaman ortada yekun sülh sazişinin imzalanması üçün heç bir maneə qalmayacaq. Bu baxımdan Vaşinqton səfəri bir daha Azərbaycanın beynəlxalq münasibətlər sistemində ciddi oyunçu rolunda qəbul edilməsinin göstəricisidir".