İsrail o aktorlardan sadəcə biridir - ÖZƏL
"Beynəlxalq münasibətlərin qeyri-sistematik, gərgin durumunda və beynəlxalq təşkilatlara inamsızlıq fonunda regional əməkdaşlıq daha cəlbedici, eyni zamanda daha əlçatan platforma kimi görünür."
Bu fikirləri siyasi elmlər üzrə fəlsəfə doktoru, politoloq Şəbnəm Həsənova Olaylar.az-a açıqlamasında bildirib:
"Vətən müharibəsi bitdikdən dərhal sonra Azərbaycan da dünya nizamının mövcud reallığını aydın dərk edərək regional əməkdaşlıq platforması təqdim etdi. Bu istiqamətdə Azərbaycan davamlı açıqlamalar və bəyanatlarla çıxış etməyə başladı.Təəssüflər olsun ki, ərazi bütövlüyümüzü və suverenliyimizi bərpa etməyimiz nəticəsində güclənən mövqeyimiz qonşu dövlətləri narahat etməyə başladı. İranla münasibətlər son dərəcə gərginləşdi. Nəhayət, Məsut Pezeşkian hakimiyyətə gəldikdən sonra münasibətlərdə istilik yarandı.Bu gün Pezeşkian tərəfindən verilən istənilən müsbət açıqlama İranda yaşayan ermənilərdə və İran-Azərbaycan münasibətlərinin gərgin saxlanılmasında maraqlı olan dairələrdə narahatlıq yaradır. Ən son Pezeşkianın oğlunun da münasibətlərimizə dair müsbət fikirlərinin şahidi olduq ki, onu da hədəf taxtasına otuzdururlar.Bütün bunlara baxmayaraq, coğrafi mövqeyimiz dəyişdirilə bilməz. Cənab Prezident İlham Əliyev bildirir ki, regiondan kənar qüvvələrin təzyiqlərinə qalsaydı, ən azı iki region ölkəsi ilə müharibədə idik. Azərbaycan isə milli maraqlarını realizə edərkən hətta qonşu ölkələrin də maraqlarını nəzərə alır.İsrail-Azərbaycan münasibətlərinin inkişaf etməsinin İranla münasibətlərimizə heç bir aidiyyatı yoxdur. Bu münasibətlər beynəlxalq münasibətlər sisteminin istənilən aktoru ilə inkişaf etdirilir ki, İsrail o aktorlardan sadəcə biridir. Axı, həm də İsrail-Azərbaycan münasibətlərinin İrana qarşı olması ilə bağlı heç bir sübut yoxdur ki, İran tərəfindən də ən son bunun olmaması ilə bağlı fikir gəldi.
Dövlət başçımız bildirir ki, Zəngəzur dəhlizinin açılması ilə Şimal-Cənub nəqliyyat dəhlizinin fərqli bir istiqaməti açılacaq. Düşünürəm ki, Şimal-Cənub nəqliyyat dəhlizinin inkişafında çətin də olsa bütün regional aktorlar ortaq məxrəc tapacaqlar."
İbrahim Məmmədli