Ermənistanda daxili gərginlik – ÖZƏL

Ermənistanın Baş naziri Nikol Paşinyan 2020-ci il Qarabağ müharibəsindəki məğlubiyyətin məsuliyyətini üç sabiq prezidentə - Levon Ter-Petrosyan, Robert Köçaryan və Serj Sərkisyana aid edib.

Maraqlıdır ki, bu, birinci hal deyil. Paşinyan tez-tez sabiq prezidentləri bu qəbildən ittihamlarla gündəmə gətirir.

"Ermənistan 30 il idi ki, Azərbaycan ərazisini işğal etmişdi. Bu işğal siyasəti Ter-Petrosyan, Sarkisiyan və Köçəryanın dövründə başlasa da, Levon Ter-Petrosyanın dövründə Azərbaycan ərazisi işğal edilməklə yanaşı, həm də azərbaycanlıların deportasiya prosesi də başlamışdı. Nikol Paşinyan hakimiyyətə gələndən sonra bu dövlət başçılarının-Ter-Petrosyan, Sarkisyan, Köçəryanın dövründə aparılan siyasəti davam etdirirdi".

Bu fikirləri Strateji Planlaşdırma və Araşdırmalar İnstitutunun rəhbəri,  politoloq Azad Məsiyev Olaylar.az-a açıqlamasında bildirib:

"Paşinyan "Qarabağ Ermənistandı. Nöqtə" şüarını səsləndirirdi. Paşiyanın apardığı siyasət, ondan əvvəlki prezidentlərin siyasətinin davamı idi. Artıq geosiyasi vəziyyət nəzərə alınaraq  Azərbaycanın xarici siyasətində yeni dönüşün yaranması, Prezident İlham Əliyevin apardığı həm xarici, həm də daxili siyasət nəticəsində bir bayraq, bir yumruq altında xalqı birləşdirdi. Nəticə etibarilə Azərbaycan öz ərazisini işğaldan azad etdi".

Politoloq qeyd edib ki, Ermənistanda fikir ayrılığı, ermənilərin Rusiya və Qərb lobbiləri arasındakı mübarizədən irəli gəlir.

"Təbiidir ki, Ermənistanın bu məğlubiyyəti Paşiyan dövründə baş verdiyinə görə ona müxalif olan qüvvələr bundan maksimum istifadə edirlər. Paşinyan da özünü müdafiə etmək üçün bütün vasitələri məqbul sayır və günahı özündən əvvəlki prezidentlərin üzərinə atır.

Ermənistanda fikir ayrılığı nədən yaranıbdır?

Ermənistanda istər Köçəryan olsun, istər Sarkisyan Rusiya yönümlü siyasət həyata keçirirdi. Başda ABŞ olmaqla Qərb də Paşiyanı öz maraqlarına uyğun siyasətin həyata keçirilməsinə təhrik etdilər və Paşiyan bir öhdəlik götürdü. Paşiyanın üzərinə götürdüyü öhdəlik Rusiyanın Ermənistanda nüfuzunu zəiflətmək idi və bunu da həyata keçirməkdədir. Yəni, Ermənistanda fikir ayrılığı ermənilərin Rusiya lobbisi ilə Ermənistanın Qərb lobisi arasında bir savaşdır. Paşinyan isə bu savaşın düz episentrində, mərkəzindədir. Ermənistanın gələcək taleyi hansı qütb üzərində formalaşacaq? Rusiya üzərində? Yoxsa Qərb? Fikir ayrılığı erməni lobbisi arasında buradan başlanıbdır. Bu proseslər davam etdikcə, Ermənistanda stabillik pozulacaqdır".

Azad Məsiyev  bildirib ki, Paşinyan özündən əvvəlki prezidentləri günahlandırsa da, Ermənistanın konstitusiyasında Azərbaycan ərazisinə iddialı məqamları saxlayaraq "Böyük Ermənistan" ideyasını davam etdirir.

"Faktiki olaraq Paşinyan məğlubiyyəti öz üzərinə götürmək istəmir və buna görə də başqalarını itham edir. Bunu təbii qəbul etmək lazımdır. Ona görə ki, özünü müdafiə etmək haqqı var və bundan da maksimum istifadə edir. Amma məsələ burasındadır ki, istər Köçəryan, istər Sarkisyan, istərsə Ter-Petrosyan, istərsə də baş nazir Paşinyanın məqsədi Azərbaycan ərazisi hesabına Ermənistan dövlətinin ərazisini genişləndirməkdir. Əgər Paşinyan özündən əvvəlki prezidentləri günahlandırırsa, onda niyə konstitusiyasında dəyişiklik etmir? Niyə Ermənistan konstitusiyasında Azərbaycan ərazisinə iddialı məqamları özündə saxlayır? "Dənizdən-dənizə böyük Ermənistan" ideyasını həyata keçirmək siyasəti bütün prezidentlərin dövründə həyata keçirilməkdədir".

Politoloq əlavə edib ki, Paşinyan erməni avantürist siyasətini davam etdirərək, Ermənistanın maraqlarını deyil, Qərbin maraqlarını güdür, bu isə erməni xalqını uçuruma sürükləyir.

"Azərbaycanın 44 günlük vətən savaşında uğurlu qələbəsindən sonra Paşinyan böyük bir zərbə alıb. Paşinyan bu zərbədən özünə gələ bilmir və Azərbaycan ərazisində torpaq əldə etmək üçün yeni manevrlər etmək istəyir. Ermənistan Qərbin həm siyasi, həm iqtisadi, həm də hərbi dəstəyini almaqdadır və Qərbi öz arxasına alaraq Azərbaycanın beynəlxalq imcinə xələl gətirmək istəyir. Ermənilərin xaricdə olan lobbiləri bu sahədə Paşinyanla birlikdə fəaliyyət göstərməkdədir. Ümumi erməni kilsəsinin ortaya qoyduğu "dənizdən-dənizə böyük Ermənistan" ideologiyasını həyata keçirmək üçün böyük güclərdən maksimum istifadə edirlər. Yəni, vaxtı ilə Köçəryan, Sarkisyan Rusiyanın imkanlarından istifadə edərək öz məqsədlərinə çatmışdır. Paşinyan isə Qərbin və ABŞ-nin dəstəyini alaraq öz məqsədlərinə çatmaq istəyir. Amma Azərbaycan, əvvəlki Azərbaycan deyil.
Ermənilərin məğlubiyyəti erməni avantürist  siyasətindən qaynaqlanır. Erməni avantürist siyasəti erməni xalqını uçuruma aparmaqdadır. Bugün Paşinyan erməni xalqının maraqlarından yox, Qərbin maraqlarından çıxış etməkdədir".

Politoloqun fikrincə, Ermənistandakı gərginlik, Qarabağ məğlubiyyəti və lobbi mübarizəsinin nəticəsidir.

"Ermənistanda hakimiyyət uğrunda bir savaş gedir. Köçəryan, Sarkisyan və əvvəlki prezidentlər Qarabağın məğlubiyyətində Paşinyanı ittiham edir. Hesab edirəm ki, Qarabağın məğlubiyyəti ermənilərin qonşularla dinc yaşama prinsipindən deyil, özlərinin məqsədlərinə çatmaq, Ermənistanın torpaq ərazisini genişləndirmək, "dənizdən-dənizə böyük Ermənistan" xülyasını həyata keçirmək üçün apardığı avantürist siyasətin məntiqi nəticəsidir. Azərbaycan istər işğal olunmuş ərazilərdə apardığı hərbi əməliyyat, istərsə də bir günlük antiterror əməliyyatlarla ərazi bütövlüyünü qorumaq və işğaldan azad etmək üçün beynəlxalq hüququn verdiyi bütün imkanlardan maksimum istifadə edib və yenə də özünü müdafiə etmək üçün tədbirlər görməkdədir. Ermənistan daxilində baş verən hadisələr, ermənilərin Rusiya lobbisi ilə Qərb lobbisi arasında gedən bir savaşdır".

Sonda Azad Məsiyev qeyd edib ki, Ermənilərin daxilində gedən proseslər bu və ya digər formada Ermənistan-Azərbaycan arasında sülh sazişinin əldə edilməsinə mane törədir. Ona görə ki, əvvəlki prezidentlərlə yanaşı Paşinyan da Azərbaycanın ərazilərinə olan iddiaları saxlamaqdadır. Yəni, istər Paşinyan, istərsə ondan əvvəlki dövlət başçıları Azərbaycan ərazisindən torpaqlar işğal etməklə öz ərazilərini genişləndirib. Bildiyiniz kimi, 1918-ci ildə ermənilər ərazisi 9 min kv. km olan bir dövlət yaratmışdılar. Azərbaycanın isə o dövrdə 114 min kv. km ərazisi var idi. Bu tarixi ədalətsizliyin bərpə edilməsini aradan qaldırmağın zamanı gəlib.

Səidə Ramazanova