QHT Televiziyası yaradılmalıdır

"33 Şəhidimizdən  bəhs "Şəhidlər ölməz, Vətən bölünməz" kitabının təqdimatını işıqlandırmaq məqsədilə bəzi telekanallara  məktub vasitəsilə müraciət etdik.  Susqunluq göstərən həmin telekanalların belə mövzuları işıqlandırmaq maraq dairısində olmadığı aydın oldu. Deyəsən, bu zavallıların maraq dairəsində cəmiyyətə, ailə institutlarına zərbə vuran qeyri peşəkar hazırlanan şou verilişlərdir. Bunun fəsadları isə zaman keçdikcə hiss olunacaq. Cəmiyyətin düşməni həm də riyakarlıqdır". "Olaylar" xəbər verir ki, bunu deyən Sosial Rifah və Tədqiqatlar İctimai Birliyinin sədri Əkrəm Baydəmirli bildirib ki, layihə ilə bağlı bəzi məqamları qeyd etmək istərdim: "Azərbaycan Respublikasının Qeyri-Hökümət  Təşkilatlarına Dövlət Dəstəyi Agentliyinin vəsaiti ilə Sosial Rifah və Tədqiqatlar İctimai Birliyinin "Zəfər tariximizə postmüharibə dövründə Vətəndaş Cəmiyyətinin töhfəsi" layihəsi çərçivəsində   33 Şəhidimizdən  bəhs edən  "Şəhidlər ölməz, Vətən bölünməz" kitabını çap  etdirmək gerçəkdən qürurvericidir. Bu layihə dövründə bizə informasiya dəstəyi göstərən bütün dostlara, internet saytlarına, bir sözlə əməyi keçən hər kəsə  dərin TƏŞƏKKÜRÜMÜ çatdırıram. 

Yekunda QHT sektorunun inkişafı ilə bağlı qısaca olaraq fikrimi bildirmək istərdim.  Dövlət olaraq, cəmiyyət olaraq QHT sektorunun maliyyə çevrəsinin genişlənməsi üzərində düşünüb, praktiki addımlar atılmalıdır. Çünki maliyyə çevrəsi  Vətəndaş Cəmiyyətinin bir çox problemlərini həll edəcək. Digər bir təklifim ondan ibarətdir ki,  Azərbaycan Respublikasının Qeyri-Hökümət  Təşkilatlarına Dövlət Dəstəyi Agentliyi  QHT Televiziyasının yaradılması istiqamətində düşünməlidir".