Tərəqqi islahatlarsız mümkün deyil- PREZİDENTİN KADR SİYASƏTİNƏ BAXIŞ
M.Həsənov bildirib ki, Azərbaycan həm Vətən müharibəsində, həm də dünyanı cənginə alan koronavirus infeksiyası ilə mübarizədə yeni texnologiyaların tətbiqi və inkişafı sahəsində böyük uğurlara malik olduğunu nümayiş etdirdi:
Prezident İlham Əliyevin həyata keçirilən uğurlu kadr siyasəti davam edir. Dövlət başçısı tərəfindən şəxsi keyfiyyətlərindən savayı müasir idarəetmə qabiliyyətinə malik, qərarların qəbul edilməsində operativlik nümayiş etdirən, ən əsası isə müasir informasiya kommunikasiya biliklərinə malik kadrların irəli çəkilməsinə üstünlük verməsi əslində zamanın tələblərindən irəli gəlir. Təsadüfi deyil ki, İlham Əliyev Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən qeyd edib ki, azad edilmiş ərazilərdə qurulacaq şəhərlər və kəndlər "smart-city", "smart-village", - yəni, "ağıllı şəhər", "ağıllı kənd" konsepsiyası əsasında qurulmalıdır: "Bu işləri indidən planlaşdırın ki, şəhərsalma aparılarkən, layihələr icra edilərkən mütləq dünyanın ən qabaqcıl texnologiyaları orada tətbiq olunsun. Ondan sonra və bəlkə də bununla paralel olaraq, bizim digər şəhər və kəndlərimizdə buna oxşar layihələri də icra etmək lazımdır. Çünki əgər biz bunu bu gün etməsək, sabah geri qalacağıq. Biz geri qala bilmərik. Bildiyiniz kimi, Davos Ümumdünya İqtisadi Forumunda iştirakım zamanı 10-larla şirkətlə görüşlərim olur, onların böyük əksəriyyəti texnoloji şirkətlərdir. Bu görüşlər əsnasında görürəm ki, dünyada hansı yeniliklər var, hansı müsbət inkişaf var və çalışıram ki, o şirkətləri Azərbaycana cəlb edim. Ona görə "ağıllı şəhər", "ağıllı kənd" konsepsiyası işlənməlidir və tətbiq edilməlidir".
Millət vəkili Malik Həsənov bildirib ki, Prezident İlham Əliyev inkişaf etmiş ölkələrin təcrübəsinə istinadən daim bu reallığı önə çəkir ki, həmin ölkələrin uğurlarının təməlində ideya, fikir, innovasiya, elmi-texniki tərəqqi dayanır. Azərbaycan da müxtəlif istiqamətlərdə islahatlar apararkən müasirləşməyə, təkmilləşməyə üstünlük verir. İslahatlar ölkəmizin gələcək dayanıqlı inkişafını şərtləndirir. Bu baxımdan ki, tərəqqi islahatlarsız mümkün deyil. İqtisadi tərəqqiyə uyğun olaraq kadr potensialının formalaşdırılması, yeni texnologiyaların inkşafı və tətbiqi şəraitində dövrün çağırışlarını yüksək səviyyədə cavablandırmaq mümkündür. M.Həsənov vurğulayıb ki, Azərbaycan İKT-nin yaratdığı imkanlardan istifadə etməklə dayanıqlı inkişafını təmin edir: "Dövlətimizin başçısı İlham Əliyevin Sərəncamı ilə 2013-cü ilin ölkəmizdə "İKT ili" elan edilməsi bu sahənin inkişafının prioritetliyinin təsdiqidir. Məhz "İKT ili"ndə ölkəmizin ilk telekommunikasiya peyki orbitə buraxılmışdır. Bu hadisə onu göstərdi ki, müstəqil Azərbaycan dövləti sürətlə, hərtərəfli inkişaf edir və artıq kosmik klubun üzvüdür. "Azərspace-1" ölkəmizdə kosmik sənayenin inkişaf etdirilməsinə, peyk texnologiyalarının geniş tətbiqinə, telekommunikasiya, internet, televiziya-radio yayımı xidmətlərinə olan tələbatın ödənilməsinə şərait yaradaraq, iqtisadi, sosial, elmi, mədəni, təhlükəsizlik və sair sahələrdə inkişafa təkan verir. 2016-cı ildə "Azərsky" müşahidə peyki və 2018-ci ildə isə "Azərspace- 2" peyki orbitə buraxıldı. Azərbaycanın kosmik sənayedə əldə etdiyi uğurlar öz növbəsində qeyri-neft sektorunun inkişafını şərtləndirir. "Azərsky" müşahidə peyki vasitəsilə nəinki ölkəmizin, dünyanın istənilən nöqtəsində baş verən bütün hadisələri daim izləyə bilirik. Azərbaycanın müdafiə və hərbi potensialının gücləndirilməsində "Azərsky" peykinin xüsusi rolu vardır. Dövlət başçısı İlham Əliyev Rəşad Nəbiyevi nəqliyyat, rabitə və yüksək texnologiyalar naziri təyin olunması ilə əlaqədar videoformatda qəbul edərkən "Əlbəttə ki, mən texnoloji inkişafla bağlı görülmüş işlər arasında peykləri qeyd etməliyəm" söyləyərək bu məqama diqqəti yönəltmişdir ki, peyklər orbitə çıxarılanda bəziləri sual verirdilər ki, bu, nə üçün lazımdır? Ancaq həyat göstərdi ki, bu günümüz və gələcəyimiz üçün əhəmiyyətli hadisədir. Həm müharibə, həm müharibədən sonrakı dövrdə peyklərdən istifadə Azərbaycana çox böyük üstünlüklər qazandırdı. Təbii ki, Vətən müharibəsi dövründə düşmənin hərəkətlərini onlayn formatda izləmək və onların təxribatlarının qarşısını almaq ölkəmizin üstünlüyü idi. Heç təsadüfi deyil ki, 44 gün davam edən İkinci Qarabağ müharibəsində Azərbaycanın apardığı əməliyyatlar dünyada hərbi ekspertlər tərəfindən XXI əsrin müharibəsi adlandırıldı. Çünki bu, texnoloji inkişaf baxımından bir yenilik idi".
"Postmüharibə dövründə həyata keçirilən quruculuq və bərpa işləri üçün də peyklərdən istifadə böyük üstünlüklər yaradacaq" söyləyən millət vəkili bildirib ki, azad edilmiş ərazilərdə şəhər və kəndlər "ağıllı şəhər", "ağıllı kənd" konsepsiyası əsasında qurulacaq. Layihələr icra edilərkən dünyanın ən qabaqcıl texnologiyaları tətbiq ediləcək. Ölkədə dayanıqlı inkişafın təmin edilməsində əsas amillərdən olan yeni texnologiyaların tətbiqi daim kadr hazırlığını da gündəmdə saxlayır: "Azərbaycan gəncləri müasir dünyagörüşə malik gənclərdir, ən əsası yenilikçidirlər. Dövlətimizin başçısı İlham Əliyevin Sərəncamı əsasında təsdiqlənən gənclərin xarici ölkələrdə təhsili ilə bağlı Dövlət Proqramının icrasında da əsas məqsəd onların elmin, yeni texnologiyaların dərinliklərini öyrənmələri, həmçinin təhsillərini başa vurduqdan sonra Vətənə dönərək əldə etdikləri təcrübəni iqtisadiyyata, ayrı-ayrı sahələrin inkişafına yönəldərək davamlı inkişafa dəstək olmalarıdır. Prezident qeyd olunan qəbulda bu hədəfi açıqlamışdır ki, istedadlı gənclərimizin Azərbaycanda fəaliyyət göstərmələri, öz biliklərini burada tam realizə etmələri və ölkə iqtisadiyyatına, ölkəmizin güclənməsinə xidmət göstərmələri üçün şəraiti lazımı səviyyədə qurmalıyıq. Ona görə ən müasir texnologiyalar Azərbaycanda bütün sahələrdə tətbiq edilməlidir".
M.Həsənov bildirib ki, Azərbaycan həm Vətən müharibəsində, həm də dünyanı cənginə alan koronavirus infeksiyası ilə mübarizədə yeni texnologiyaların tətbiqi və inkişafı sahəsində böyük uğurlara malik olduğunu nümayiş etdirdi: "Azərbaycan Ordusunun maddi-texniki bazasının möhkəmləndirilməsi, müasir texnika ilə təchizatı hər zaman prioritet məsələdir. Ölkə Prezidenti bu məqsədi də açıqlayır ki, texnoloji inkişaf sahəsində daim qabağa hədəflənməli, hərbi sahədə yenilikləri Azərbaycana gətirməliyik. COVID-19-la mübarizə ölkəmizin informasiya texnologiyaları sahəsində mövcud imkanlarına bir daha aydınlıq gətirdi. Özünütəcrid dövlətlərarası münasibətlərdə də vacib amil kimi önə çəkildiyindən ölkə Prezidenti İlham Əliyevin pandemiya dövründə bu və ya digər dövlətin, beynəlxalq təşkilatın rəsmiləri ilə görüşləri, eyni zamanda, onun təşəbbüsü ilə Türk Şurasının, Qoşulmama Hərəkatının Zirvə görüşləri, BMT Baş Assambleyasının xüsusi sessiyası videoformat şəkilində təşkil olunub. Təbii ki, bu kimi mühüm addımlar müasir texnologiyalar olmadan mümkün deyil. Uğurlarımız bu əminliyə əsas verir ki, gələcək illərdə Azərbaycan informasiya-kommunikasiya texnologiyaları sahəsində liderlik mövqeyini daha da möhkəmləndirəcək".
Zəka
Olaylar.az